Lubaji 6—Kufunjishanga Mafunjisho a Baibolo Anunguluka
Byo Twafwainwa Kuba Inge ye Tufunjisha Baibolo Waipuzha Bwipuzho
1 Lufunjisho lwa Baibolo umvwe lwatendeka, kyanema bingi kufunjisha mafunjisho a mu Baibolo monka moalondankena mu kifulo kya kukilaukila mitwe. Kino kikwashako ubena kufunda Baibolo kwala kitendekesho kya maana alumbuluka a kuyuka bintu ne kukomenako ku mupashi. (Kolo. 1:9, 10) Nangwa byonkabyo, javula bafunda Baibolo bepuzha mepuzho pa mitwe yapusana pusana kimye kya lufunjisho. Twakonsha kuba byepi?
2 Yukai mwa Kubila: Mepuzho akwatankana na lufunjisho lubena kufunjiwa akonsha kukumbulwa ponkapotu. Umvwe kya kuba bwipuzho bukambiwapo mu buku wa kufundamo, mubulai kuba’mba mukafunda kyokyo kishinka. Nangwa byonkabyo, umvwe bwipuzho kechi bwakwatankana na lufunjisho lubena kufunjiwa ne, nangwa kampe kibena kukebewa kupesapesa pa kuba’mba mukumbule mukumbu wafwainwa, kyakonsha kuwama bingi kwisambapo panyuma ya lufunjisho nangwa kimyetu kikwabo. Basapwishi bamo bamona’mba kunemba bwipuzho kulengela ubena kufunda Baibolo kuyuka’mba bwipuzho bwanji busa kulangulukwapo bulongo kabiji pa kimye kimotu kikwashako kutesha muchima pa lufunjisho.
3 Mafunjisho a mu Baibolo avula ambiwakotu pacheche mu mabuku etu a kufunjishamo. Ki ka kyafwainwa kubiwa umvwe kya kuba’mba ye tufunjisha kimukatazha bingi kuswa mafunjisho amo nangwa umvwe kya kuba wakoselatu ngangala ku mafunjisho a bubela? Kyakonsha kuwama bingi kwisambilapo byambo bikwabo byalumbulula bulongo yewo mutwe kwesakana na bifunjisha Baibolo. Umvwe kya kuba kechi wakishiinwa ne, ao mutwe akimulekai kuba’mba mukesambapo kimye kikwabo. Twajijilai na lufunjisho lo muba jonse. (Yoa. 16:12) Byo akatendeka kwikala na maana a kuyuka Baibolo ne kukomenako ku mupashi, wakonsha kumvwisha lolo lufunjisho lwa mu Baibolo.
4 Ipelulai: Inge kya kuba’mba kechi mwayuka mukumbu wa bwipuzho bwaipuzhiwa ne, jimukai kuchina mwakakumbula mukumbu wabula kuyilamo. (2 Timo. 2:15; 1 Pe. 4:11) Lumbululai kuba’mba mukakebakeba bishinka apa bino mukakumbule. Mwakonsha ne kwingijisha kino kyonka kimye kukwashishamo ye mufunjisha bya kukeba bishinka. Pa kimye pa kimye mu mweshainga bya kwingijisha mabuku apusana pusana anengezhiwa na jibumba ja Yehoba. Mu jino jishinda ukakumbulanga mepuzho anji mwine.—Byubilo 17:11.