Lubaji 9—Kufunjishanga Mafunjisho a Baibolo Anunguluka
Kufunjisha Botufunjisha Baibolo Kusapwila Busapwishi bwa Kushukilwa
1 Andeleo ne Filipa byo bayukile’mba Yesu ye Mesiasa walayiwe, kechi bazhindaminepotu kwakubula kubulako bakwabo mambo a lusekelo ne. (Yoa. 1:40-45) Ne lelo jino, bafunda Baibolo byo batatula kwitabila bintu byo babena kufunda, bibalengela kukeba kubulako bakwabo. (2 Ko. 4:13) Twakonsha kwibatundaika byepi kusapwila busapwishi bwa kushukilwa kabiji ne kwibafunjisha kusapwila bulongo?
2 Mwakonsha kumushikisha ye mufunjisha kana wa kibulapo kala bakwabo bintu byo afunda mu Baibolo nyi. Kampe pajipo bakwabo nangwa ba mu kisemi bo akonsha kwitako kuba’mba nabo beye batanwepo pa lufunjisho. Mwipuzhai emubule kana bakwabo mo bengijila nkito, bakwabo baana basukulu, nangwa balunda nanji bamwesheshepo lusekelo lwa kukeba mambo awama. Mu jino jishinda wakonsha kutatula kusapwila. Mukwashai kumvwisha buneme bwa kwikala na milangwe, mushingi kabiji ne kulangulukilako bakwabo kimye kyo abena kwamba nabo pe Yehoba Lesa kabiji ne pa nkebelo yanji.—Kolo. 4:6; 2 Timo. 2:24, 25.
3 Kubulako Bakwabo Bintu byo Baitabilamo: Kyanema bingi kufunjisha botufunjisha Baibolo kwingijisha Mambo a Lesa pa kubulako bakwabo bintu byo baitabilamo. Kimye kyo mubena kwisamba bishinka bimo byo mwasalulula, mushikishai amba: “Mwakonsha kwingijisha byepi Baibolo kulumbulula buno bukine ku ba mu kisemi kyenu?” nangwa “Kinembelo ka kya mu Baibolo kyo mwakonsha kwingijisha kumwesha bukine bwa kino ku bakwenu?” Telekeshai ku byo abena kukumbula, kabiji ne kumulumbulwila bya kufunjisha mafunjisho a mu Binembelo. (2 Timo. 2:15) Kupichila mu kuba bino, mukakwasha ye mufunjisha kusapwila busapwishi bwa kushukilwa, kabiji umvwe wafikapo, ukasapwilanga pamo na kipwilo.
4 Kyanema bingi kufunjisha bafunda Baibolo bya kuba na lupato. (Mat. 10:36; Luka 8:13; 2 Timo. 3:12) Umvwe bakwabo baipuzha mepuzho nangwa baambapo bimo pa Bakamonyi ba kwa Yehoba, kino kyakonsha kumushinkwila jishinda ufunda Baibolo kushimuna bukine. Buloshuwa wa Inte sha kwa Yehova—Ni Bani? Finshi Basuminamo? wakonsha kwibakwasha ‘kwikajila jimo na mwa kukumbwila.’ (1 Pe. 3:15) Uno buloshuwa uji na byambo byawama bingi bakatataka byo bakonsha kwingijisha kukwasha balunda nabo ne ba mu kisemi kyabo babena kwibakanya kufunda kumvwisha mafunjisho ne byubilo bya mu Baibolo.