Mutanchi wa Kisemi—Kinembelo kya Juba
1 Pa juba pa juba, bansemi ba butemwe bebikako bingi kunengezhela baana babo kajo kapita mukyaji. Kyakilamo kunema ke kwibanengezhela kajo ka ku mupashi kafuma mu Mambo a Lesa. (Mat. 4:4) Jishinda jimo jo mwakonsha kukwashishamo baana benu kwikala na mujojo wa kukeba kajo ka ku mupashi ne ‘kufika ku lupulukilo’ ke kupichila mu kwisambila pamo kisemi kyonse kinembelo kya juba ne byambo bya kwambapo. (1 Pe. 2:2) Kimye ka kyo mwakonsha kubilangamo kino pa mutanchi wenu wa kisemi?
2 Pa Bimye bya Kuja Kajo: Kutatula juba na kinembelo kwakonsha kukwasha kisemi kyenu kulangulukanga pe Yehoba juba jonse. (Sala. 16:8) Nsemi umo wamukazhi wafuukwilepo kutangilanga pamo na mwananji wa mulume kinembelo ne byambo bya kwambapo kimye kya kuja kajo ka kwiaula kabiji ne kulombela pamo saka akyangye kuya ku sukulu. Kino kyamukwashanga kuyuka bya kuba na lukatazho lwa kutumbijika kyalo, kushinda meseko a kuba byubilo byatama, kabiji kyamukwashanga ne kusapwila ku bakwabo baana basukulu ne ku bafunjishi kwakubula moyo. Nangwa kya kuba wajingapotu bunke Kamonyi pa sukulu, kechi waumvwanga’mba ujitu bunke ne.
3 Umvwe kechi kyakonsheka kwisamba kinembelo lukelo ne, mwakonsha kwisambila pamo kisemi kyonse pa kimye kikwabo jojo juba, kampe kimye kya kuja kajo ka mulajilo. Bamo pa kino kimye popo besamba bimweka mu mwingilo wa mu bujimi ne bishinka byo bafunda mu kutanga Baibolo kwa pa bunke bwabo. Bavula bavuluka bintu bya uno mutundu kimye kya kuja kajo ka mulajilo kuba’mba ke bintu bimo bileta lusekelo byo bafwainwa kwisambila pamo kisemi kyonse.
4 Kimye kya Bufuku: Bisemi bimo, kimye kibiwamina kwisamba kinembelo kya juba ke kimye kya kuba saka bakyangye kuya na kulaala. Kabiji kino kyakonsha kwikala kimye kyawama bingi kulombela pamo lulombelo. Umvwe baana benu saka bemumvwa jonse na kwamba pe Yehoba kabiji ne kulomba kwi aye, bamuyukisha kya kine.
5 Mwane kine Yehoba emubilenga bibusa pa byo mwibikako na kufunjisha baana benu bukine kupichila mu kwingijisha bulongo Kubalaulabalaula mu Binembelo pa Juba pa Juba.