Nanchi Mubena Kumwenamo mu Kubalaula Binembelo Moba Onse Nyi?

Nanchi mutanga kinembelo kya juba mu kabuku ka Kubalaula Binembelo Moba Onse nyi? Inge kechi mutanga moba onse ne, tubena kwimutundaika kutendeka kuba bino. Kuba bino kukemukwasha kufwenya kwipi ne Yehoba. Bavula babalaula kinembelo kya juba lukelo. Kuba bino kwibakwasha kulangulukangapo pa kyokyo kinembelo byo babena kwingila mingilo yapusana pusana pa jojo juba. (Yos 1:8; Sl 119:97) Ki ka kyakonsha kwimukwasha kufunjilako byavula ku kinembelo kyo mubena kubalaula jojo juba? Kyakonsha kwimukwasha ke kutanga kitango kyonse pafuma kyokyo kinembelo, pa kuba’mba muyuke byamwekelenga kimye kyo kyanembelwe. Vulukaipo jishimikila ja mu Baibolo jitufunjisha kishinka kiji mu kinembelo kya juba. Kabiji langulukai pa byo mwakonsha kwingijisha kyokyo kishinka mu bwikalo bwenu. Inge ke mulondele byaamba Mambo a Lesa pa kufuukula bintu, mukafuukulanga bintu bulongo.—Sl 119:105.

Bisemi bya Betele mwaya ntanda bibalawila pamo kinembelo kya juba lukelo saka bakyangye kutendeka kwingila. Kabiji ano moba, pa keyala wa JW Broadcasting^® babikapo mavidyo avula a kuno kubalaula kinembelo kwa pa Betele. Mwakonsha kwiataana pa kipungu kya kuba’mba MUTANCHI NE KUPWILA KUKATAMPE. Nanchi mwakitambapo kala ano mavidyo nyi? Inge ibyo, ñanyi kimye kyapeleleko kwiatamba? Bintu byo bafunjisha mu ano mavidyo byakonsha kwimukwasha bingi. Akimonai byo baambilepo pa jishimikila ja kwa Lota, ne byo jitufunjisha kufuukula bintu bulongo.

TAMBAI VIDYO WA KUB’MBA KANGE MUTEMWENGA PANO PA NTANDA NE (1YO 2:15), APA BINO MUKUMBULE ANO MEPUZHO:

• Ñanyi jifunde ja mu Baibolo jo bafunjishenga mu uno mwisambo wa Kupopwela kwa Lukelo kwa pa Betele?

• Jishimikila ja kwa Lota jitufunjishapo ka pa kizumba kiji mu kutemwa pano pa ntanda nangwa bintu bya pano pa ntanda?—Nt 13:12; 14:12; 19:3, 12, 13, 24-26

• Twakonsha kumwesha byepi amba twatemwa Yehoba, kechi pano pa ntanda nangwa bintu bya pano pa ntanda ne?