Kwashai Bakwenu Kwikala ba ‘Kukokela na Muchima’

1. Yehoba ukeba ka ku bapopweshi banji?

¹ Lukokelo lwanema bingi pa kuba’mba mpopwelo yetu itabilwe kwi Yehoba. (Mpitu. 12:28; 1 Pe. 1:14-16) Katatakatu luzhachisho lwa Lesa lukeye na ‘kushinkanya nabo babula kuyuka Lesa, ne abo babula kukokela mambo awama.’ (2 Tesa. 1:8) Twafwainwa kukwasha byepi bakwetu kwikala ba ‘kukokela na muchima’ mafunjisho a Mambo a Lesa?—Loma 6:17.

2. Mambo ka o kyanemena kukwasha bakwetu kukomesha lwitabilo lwakosa?

² Kupichila mu Kwibakwasha Kukomesha Lwitabilo ne Butemwe: Mu binembelo, lukokelo lwendela pamo na lwitabilo. Mutumwa Paulo waambilepo pa ‘mukambizho wa Lesa wa myaka ne myaka, amba, belukokele lwitabilo.’ (Loma 16:26) Mu Bahebelu kitango 11 mwanembwa bya kumwenako byavula bya lwitabilo, byavula byavwangamo kuba bintu kwesakana na mo akebela Yehoba. (Hebe. 11:7, 8, 17) Kabiji, kubula lukokelo kwendela pamo na kubula lwitabilo. (Yoa. 3:36; Hebe. 3:18, 19) Twafwainwa kukomeshako busendwe bwetu bwa kwingijisha Mambo a Lesa pa kuba’mba tukwashe bakwetu kwikala na lwitabilo lulengela kwikala na lukokelo.—2 Timo. 2:15; Yako. 2:14, 17.

3. (a) Lukokelo lwakwatankana byepi na butemwe? (b) Twakonsha kukwasha byepi bafunda Baibolo kukomesha butemwa bwa kutemwa Yehoba?

³ Kabiji lukokelo lwakwatankana na butemwe bwa kutemwa Lesa. (Mpitu. 5:10; 11:1, 22; 30:16). Yoano mutanshi 5:3, wamba’mba: ‘Kutemwa Lesa ko ko kuno, amba, tulame mikambizho yanji; kabiji mikambizho yanji kechi yakatazha ne.’ Twafwainwa kukwasha byepi bafunda Baibolo kukomesha butemwa bwa kutemwa Yehoba? Ikalaipo na kimye, mu kimye kya lufunjisho kya kubayishishamo lusanchilo lwanji lwa kusanchila byubilo bya Yehoba. Mweshai byo mwiumvwa anwe bene pe Lesa. Kwashai ubena kufunda kulanguluka mashinda mo afwainwa kwikelamo na bulunda na Yehoba. Kyakila pa byonse, butemwe bwa kutemwa Yehoba butundaika bakwetu kabiji ne atwe bene—kukokela na muchima.—Mat. 22:37.

4. (a) Mambo ka kya kumwenako kyetu o kyanemena? (b) Twafwainwa kuba byepi pa kuba’mba twikale na ‘muchima wa milangwe nangwa’mba wa lukokelo’?

⁴ Kupichila mu kya Kumwenako Kyetu: Jishinda jawama ja kukwashishamo bakwetu kukokela mambo awama ke kupichila mu kya kumwenako kyetu. Pano bino, kikebewa kutako bingi muchima pa kuba’mba twikale na ‘muchima wa milangwe nangwa’mba wa lukokelo.’ (1 Mfu. 3:9; Mana. 4:23) Kino kivwangamo ka? Yuzhai muchima wenu na kajo ka ku mupashi kupichila mu lufunjisho lwa Baibolo lwa kimye kyonse ne kutanwa ku kupwila. (Sala. 1:1, 2; Hebe. 10:24, 25) Pwanañenainga pamo na boba baovwa michima yabo na mpopwelo ya kine. (Mana. 13:20) Ingilaingako mu mwingilo wa mu bujimi kimye kyonse, na muchima wa kukeba kukwasha baji mu nyaunda yenu. Lombainga bukwasho bwa Yehoba kwimukwasha kwikala na muchima wawama. (Sala. 86:11) Chinuzhukainga bintu byakonsha kongola muchima wenu, nabiji byubilo nangwa bya kisangajimbwe byabula kufwainwa. Londalondainga bintu byafwainwa kwimulengela kufwenya kwipi ne Lesa kabiji byafwainwa kukosesha bulunda bwenu ne aye.—Yako. 4:7, 8.

5. Balukokelo babena kupeshiwa byepi?

⁵ Yehoba wabujile bantu bakunyuma amba mapesho akeya pe abo inge saka bateleka ku jiwi janji. (Mpitu. 28:1, 2) Mu jishinda jimotu, Yehoba ubena kupesha “bamukokela.” (Byubilo 5:32) Onkao mambo, kupichila mu kufunjisha ne mu kya kumwenako kyetu, twayai tukwashenga bakwetu kwikala ba kukokela na muchima.