Komeshainga Busendwe bwa Kwambañana na Bantu
1. Jishimikila ka ja mu Baibolo jo tusakwisambapo, kabiji mambo ka?
1 Byonka byo kyanembwa mu Byubilo 13:16-41, jashi jaambile mutumwa Paulo mu nshinagoga mu Antioka wa mu Pisidya, jitumwesha bulongo byo twafwainwa kwambañana na bakwetu. Paulo walangulukilenga pa bwikalo ne bintu byalangulukilenga banteleki banji, kabiji ne kwibyesakanya na mambo awama o aambilengapo. Byo tusakwisambanga pa jino jishimikila, twayai tumone byo twakonsha kuba netuwa mu mwingilo wetu.
2. Ki ka kyo tufunjilako ku jishinda jatendekejilemo Paulo jashi janji?
2 Ambainga pa Bintu byo Bayuka: Nangwa kya kuba mambo ambilenga Paulo aimenejile pa mwingilo wa Yesu wa kufikizha nkebelo ya Lesa, Paulo kechi watendekele kwamba jashi janji pa kino kishinka ne. Waambilenga pa bintu byayukile luonde lwa Bayudea ko kuba’mba mpito ya Bayudea. (Byubilo 13:16-22) Mu jishinda jimotu, tukesambanga na bantu bavula ne kwibafika pa michima inge saka twamba pa bintu byayukanyikwa bulongo. Kino kikebewa kwibatundaika kwamba biji ku michima yabo kupichila mu kwibepuzha mepuzho mu jishinda jalumbuluka kabiji ne kwibateleka bulongo pa kuba’mba tuyuke bintu byanema mu bwikalo bwabo.
3. Ki ka kyalengejile banteleki ba kwa Paulo kukankalwa kuswa kuba’mba Yesu ye wajinga Mesiasa walayiwe?
3 Kimye kyo ambilenga pa mpito ya Bayudea, Paulo wavulwileko banteleki banji pa mulaye wa Lesa wa kusemwa kwa Mupulushi kufuma mu kisemi kya Davida. Nangwa byonkabyo, Bayudea bavula bapembelejilenga mushilikale, mwanamulume wakosa wa kushinda bufumu bwa bene Loma kabiji ne kulenga bufumu bwa Bayudea kutumbalala pa bufumu bukwabo. Kechi balubile kuba’mba Yesu bamukaine ku batangi ba bupopweshi bwa Bayudea mu Yelusalema, kabiji ne kumupana mu maboko a bantangi ba bena Loma ne kumwipaya ne. Paulo wakonsheshe kwibashiina byepi kuba’mba Yesu ye wajinga Mesiasa walayiwe?
4. Paulo waambañene byepi mu jishinda jalumbuluka na jibumba ja Bayudea?
4 Pimpulainga Nsolomokelo Yenu: Pa kuyuka bintu byo balangulukilenga banteleki banji, Paulo waingijishenga Binembelo kwambañana nabo kwesakana na bintu byo bayukijile jimo. Kya kumwenako, walumbulwile Yesu kwikala wa mu kisemi kya Davida kabiji amba ye ye bayukanyikishe kwi Yoano Mubatishi, ao wayukanyikilwe bingi amba ngauzhi wa Lesa. (Byubilo 13:23-25) Paulo walumbulwile kuba’mba kumukana Yesu ne kumwipaya, bantangi ba bupopweshi ‘bafikizhe mawi a bangauzhi ba Lesa.’ (Byubilo 13:26-28) Kabiji walondolwele kuba’mba kwajinga batumonyi bemwenejile bene kimye Yesu kyo asangwilwe ku bafu, kabiji wibamwesheshe Binembelo byo bayukile bulongo byafikizhiwe kimye Yesu kyo asangwilwe.—Byubilo 13:29-37.
5. (a) Paulo wapimpwile byepi byambo byanji kimye kyo aambilenga ku jibumba ja Bangiliki? (b) Twakonsha kulondela byepi kya kumwenako kya kwa Paulo kimye kyo tubena kusapwila mu nyaunda yetu?
5 Kabiji kimye kyo aambilenga ku jibumba ja Bangiliki pa Aleopagusa mu Atene, Paulo wibasolomokejile mu jishinda japusanako. (Byubilo 17:22-31) Bino, waambile pa mambo amotu, kabiji mu onse mashinda abiji kwingila kwanji na mukoyo mwafumine bintu byawama. (Byubilo 13:42, 43; 17:34) Mu jishinda jimotu, tukafikanga bantu bavula pa michima na mambo awama umvwe ke tusale bintu byo bayuka bulongo, kabiji inge saka tupimpula bya kwamba kwesakana na bwikalo bwabo ne bintu byo balangulukapo.