Funjishainga Bakimote Kwenda mu Jishinda ja Lesa
1. Ki ka kyavwangiwamo mu kulenga baana ba bwanga?
1 Baana ba bwanga ba kwa Yesu ba mu myaka kitota kitanshi bebatongolanga kuba’mba bajinga ba mu “Jishinda.” (Byubilo 9:2) Bwina Kilishitu bwa kine bwavwangamo bwikalo bonse bwa muntu. (Mana. 3:5, 6) Onkao mambo, umvwe tubena kufunjisha mafunjisho a Baibolo, twafwainwa kuba byavula kukila pa kufunjishatu maana alumbuluka a kuyuka a lufunjisho lwa mu Baibolo. Twafwainwa ne kukwasha bafunda Baibolo kwenda mu jishinda ja Yehoba.—Sala. 25:8, 9.
2. Ki ka kyakonsha kukwasha ufunda Baibolo kulama mikambizho ya Lesa?
2 Butemwe bwa Kutemwa Yehoba ne Yesu: Byo kyashupapo bantu bambulwakoloka kwikala na ndangulukilo, ñambilo, ne byubilo bikeba Lesa! (Loma 7:21-23; Efi. 4:22-24) Nangwa byonkabyo, butemwe bwa kutemwa Lesa ne Mwananji butundaika bakimote kusenda uno mutembo washupa. (Yoa. 14:15; 1 Yoa. 5:3) Twakonsha kukwasha byepi bo tufunjisha Baibolo kwikala na buno butemwe?
3. Twakonsha kukwasha byepi bafunda Baibolo kwikala na butemwe bwa kutemwa Lesa ne Yesu?
3 Kwashai ye mufunjisha kuyuka Yehoba byo aji. Mulongo umo walumbulwile kuba’mba, “Bantu kuba batemwa muntu ye babula kuyuka ne, onkao mambo, ku ntendekelotu ya lufunjisho, nebafunjisha jizhina ja Lesa kufuma mu Baibolo, kabiji nkebapo mashinda a kulumbulwilamo byubilo bya Yehoba.” Kulumbulula kya kumwenako kya kwa Yesu ke jishinda jawama bingi ja kubilamo kino. (Yoa. 1:14; 14:9) Kunungapo, ingijishainga kabokoshi ka kupitulukamo kaji ku mpelo ya kitango kyonse kiji mu buku wa Baibolo Ufunjisha kukwasha ubena kufunda kuyuka byubilo byawama bya Lesa ne Mwananji.
4. (a) Mambo ka bafunda Baibolo bavula o bekitaina kushupa kusapwila? (b) Twakonsha kukwasha byepi bo tufunjisha kuya mu mwingilo wa bwina Kilishitu kimye kitanshi?
4 Ikalai Bakumwenako pa Kufunjisha: Byo tuji bafunjishi kabiji batangijila, tumwesha bakwetu byo kilumbulula kwenda mu jishinda ja Lesa kupichila mu byo tuba. (1 Ko. 11:1) Kya kumwenako, bafunda Baibolo bavula kechi bakasuluka kusolomoka bantu pa kuba’mba besambe nabo byo baitabilamo ne. Onkao mambo, kikebewa kutekanya ne kwikala na busendwe bwa kwibakwasha kwikala na butemwe, luketekelo, ne kwibapa lutundaiko lubena kukebewa lwa kwingilako mu mwingilo wa kusapwila ne wa kulenga baana ba bwanga. (2 Ko. 4:13; 1 Tesa. 2:2) Kukebesha kwetu kwa kutangijila bo tufunjisha kuketulengela kuya nabo kimye kitanshi kyo batendeka kuya mu mwingilo wa bwina Kilishitu.
5. Kya kumwenako kyawama kikwasha byepi bafunda Baibolo kuyuka bikebewa pa kulondela mikambizho ya Lesa?
5 Kya kumwenako kyenu kyakonsha kufunjisha bafunda Baibolo mashinda akwabo anema a bwikalo bwa bwina Kilishitu. Umvwe mwapempula bakolwa nangwa kwimuna bakwenu saka mwasangalala pa kimye kya kupwila kwa kipwilo, bamona butemwe bwenu mu byo mubena kuba. (Yoa. 15:12) Umvwe ke mwingileko mwingilo wa kuwamisha Nzubo ya Bufumu nangwa kuba bintu bya kukwasha bakwenu, mubena kwibafunjisha nabo bya kwingila. (Yoa. 13:12-15) Umvwe bemumona kuba’mba mwikala bwikalo bwapela, bomvwisha byo kilumbulula ‘kukeba bufumu patanshi.’—Mat. 6:33.
6. Bintu ka bifumamo mu kukwasha bakimote kwingijila Yehoba?
6 Mwingilo wa kufunjisha bantu Mambo a Lesa ne wa kulenga baana ba bwanga ukebewa kwibikako. Pano bino byo kisangajikapo pa kumona bakimote saka “babenakwenda mu bukine”!—3 Yoa. 4.