Tainga Bantu Muchima—Kupichila mu Kwibatala na Mushingi
1 Kimye kya kusapwila ku mvula bantu ne ku nzubo ne nzubo, javula twitala na bantu saka tukyangye kutendeka kwamba. Mu kake kakimye kacheche, twakonsha kuyuka bibena kwiumvwa bantu pe atweba kupichila mu kumona byo babena kumweka pa kilungi ne byo babena kwiumvwa jojo juba. Mu jishinda jimotu, nabo bakonsha kuyuka byavula pe atweba. Mwanamukazhi umo waambile bino pa mambo a Kamonyi wamufwakeshe’mba: “Vulukakotu kilungi kyanji kya lusekelo kyo amwesheshe. Wazakwile bingi muchima wami.” Kino kyalengejile uno mwanamukazhi kumvwa mambo awama.
2 Kutala bantu ke jishinda jawama bingi ja kutendekelamo kusapwila kimye kya kusapwila busapwishi bwa mu mukwakwa nangwa kusapwila mu mapunzha akwabo mutanwa bantu bavula. Mulongo umo utala bibena kumwekanyika bilungi bya bantu bo asambakana. Umvwe wikinka nabo meso, umwemwesela kabiji ne kwibamwesha magazini. Kwingijisha jino jishinda, wisamba bingi misambo yawama na bantu ne kusha mabuku avula.
3 Kuyuka Bibena Kwiumvwa Bantu: Kutala bantu kuketukwasha kuyuka byo babena kwiumvwa. Kya kumwenako, inge muntu umo kyamukatazha bingi kwitumvwa nangwa wakana byonse byo twamba, twakonsha kuyuka kupichila mu kumona bibena kumwekanyika kilungi kyanji. Inge wapayankana nangwa kamwekane kuzhingila, twakonsha kuyuka kupichila mu kumona bibena kumwekanyika kilungi kyanji. Twakonsha kupimpula nangwa kukepeshako bya kwamba. Kuyuka bukiji bibena kwiumvwa bantu, ke jishinda jawama bingi ja kumwesheshamo byo twibata muchima.
4 Bukishinka ne Kusumininwa: Mu bisho byavula, kutala muntu kumwesha kuba’mba muntu uji na bukishinka. Akimonai Yesu byo akumbwile kimye baana banji ba bwanga baipwizhe’mba: “Nanchi wayuka kupuluka ñanyi?” Baibolo ushimikizha amba: ‘Yesu pa kwibatala waambile’mba, ku bantu kechi kikonsheka ne; pakuba byonse byakonsheka kwi Lesa.’ (Mat. 19:25, 26) Kwakubula nangwa kuzhinaukatu ne, ntajilo yatajilangamo Yesu bantu, yalengelanga bantu kunemeka byambo byanji. Mu jishinda jimotu, kutala bantu na mushingi kuketukwasha kusapwila mambo a Bufumu na bukishinka ne na kusumininwa.—2 Ko. 2:17; 1 Tesa. 1:5.