Ikalai na Jiso Jijitu
1. Kilumbulula ka kwikala na jiso jijitu, kabiji kino kyanemena ka?
1 Mu Jashi janji ja pa Mutumba, Yesu waambile pa jiso jetu ja kifwanyikizho nangwa amba ja ku mupashi byo jakonsha kuba mu bwikalo bwetu bonse. Waambile’mba: “Umvwe jiso jobe jijitu, ne mubiji wobe yense usakwikala watoka. Kabiji umvwe jiso jobe jabipa, ne mubiji wobe yense usakwikala wafita.” (Mat. 6:22, 23) Jiso jijitu ke joja jazanza pa kintu kimo, ko kuba’mba kuba kyaswa muchima wa Lesa kechi kulabikwa na bijikila byakilamo bya kulanguluka pa bintu bya ku mubiji ne. (Mat. 6:19-21, 24-33) Ki ka kyakonsha kwitukwasha kutwajijila kwikala na jiso jijitu?
2. Mambo a Lesa etutundaika kwikala na mweno ya mutundu ka na bintu bya ku mubiji?
2 Kusekela mu byo Tuji Nabyo: Kumwena ba mu nzubo bintu bikebewa ke mutembo wa mu Binembelo. (1 Timo. 5:8) Pano bino, kino kechi kilumbulula’mba tufumpilenga bintu byakilamo kuwama ne bya katataka ne. (Mana. 27:20; 30:8, 9) Mu kifulo kya byobyo, Binembelo bitukambizha kwikala ba kusekela na “kajo ne bivwalo,” bikebewa mu bwikalo. (1 Timo. 6:8; Hebe. 13:5, 6) Kulondela luno lujimuno kwakonsha kwitukwasha kulama jiso jetu bulongo.
3. Ki ka kyakonsha kwitukwasha kubula kwitwika atweba bene bisendwa?
3 Twakonsha kuba bingi bulongo kuchinuzhuka kwitwezha mu makongole abula kufwainwa ne kukanamina bintu byakonsha kwitupwishisha kimye kyabaya ne bulume. (1 Timo. 6:9, 10) Twakonsha kuba byepi bino? Umvwe ketulanguluke bya kuba, twafwainwa kulomba lulombelo pa kyokyo kintu ne kwikipesapesa bulongo umvwe kyakonsha kwitonawina bikonkwanyi byetu bya ku mupashi. Monai’mba mubena kutangizhako bintu bya ku mupashi mu bwikalo bwenu.—Fili. 1:10; 4:6, 7.
4. Mambo ka o twafwainwa kumonapo mashinda a kupezhezhamo bwikalo bwetu?
4 Pezhaiko Bwikalo Bwenu: Jishinda jikwabo ja kwitukwasha kubula kukebulwa ku bintu bya ku mubiji ke kumonapo mashinda akonsha kwitukwasha kupezhezhamo bwikalo bwetu. Mulongo umo, wataine kuba’mba kisemi kyanji kyakonsha kwikala bulongo kwakubula bintu bya ku mubiji byakilamo. Uno mulongo waambile’mba: “Pano nakonsha kwingila pakatampe bingi mu kipwilo na kukwasha balongo bami. Nashiinwa kuba’mba Yehoba upesha bakalume banji bonse umvwe batangizhako mpopwelo ya kine kukila bintu bya ku mubiji.” Nanchi ne anweba mwakonsha kwiyowa mapesho akatampe kupichila mu kupezhako bwikalo bwenu nyi?
5. Mambo ka o kikebewa kwibikishako kulama jiso jetu bulongo?
5 Kikebewa kwibikishako bingi na kumukana Satana kuchina waketutwala mungi, kukana bintu byanji bya ino ntanda, ne bumbulwakoloka bwetu. Mu kifulo kya kuleka meso etu na kutalatala, twayai twi azanze pa kuba kyaswa muchima wa Lesa ne pa luketekelo lwetu lwawama lwa bumi bwa myaka.—Mana. 4:25; 2 Ko. 4:18.