Kupwila kwiikajila Kubena Kwiya

Jiso jalengwa mu jishinda ja kukumya. (Sala. 139:14) Pano bino, jishikimanatu pa kintu kimo kabiji pa kimye kimotu. Kino kingilatu monse mubiji, mu bukumonatu byonkabye ne mu bukifwanyikizho. Pa kuba’mba tumonenga bulongo ku mupashi, twafwainwa kutako muchima kuba kyaswa muchima wa Lesa. Byo kiji kuba’mba bintu bilabikañana bibena kuvujilakotu mu ino ntanda ya kwa Satana, byo kyawamapo kwikala na pologalamu wa kupwila kwiikajila kwa mwaka wa mwingilo wa 2006 kukambanga pa kishina kya kuba’mba “Ikalai na Jiso Jijitu”!—Mat. 6:22.

Twafwainwa kuba byepi pa kuba’mba tutambule mapesho afuma kwi Yehoba? (Mana. 10:22) Buno bwipuzho bukakumbulwa mu jashi jibena kwamba’mba “Nowainga Byawama na Mambo a Kwikala na Jiso Jijitu.” Misambo ya mepuzho ikalumbulula bulongo byo twakonsha kumwenamo mu kwingijisha mafunde a mu Binembelo. Jashi jitanshi jikamba ñambi mwenyi ja kuba’mba, “Kwikala na Jiso Jijitu mu Ntanda Ibi,” jiketujimunako pa bintu bimo bimo byakonsha kwitulengela kubula kukomenako ku mupashi. Kabiji tukafunda ne kyavwangiwamo mu kusala “akya kyawama.”—Luka 10:42.

Bansemi ne bakwabo bakonsha kutundaika byepi bena Kilishitu bakyanyike kuta muchima ku bintu bya ku mupashi? Majashi a kuba’mba “Bansemi Batonga Bulongo Miketo” ne “Bakyanyike Bakanamina Bikonkwanyi bya ku Mupashi” akavwangamo bansemi ne bakyanyike kukumbula buno bwipuzho bwanema. (Sala. 127:4) Jashi jikapelako jikamba ñambi mwenyi jikalumbulula byo twafwainwa kutako muchima kwendelanga pamo na jibumba ja Yehoba pa muntu pa muntu, mu kisemi ne mu kipwilo.

Kikale po po twafundatu bukine nangwa twaingijila Yehoba pa myaka yavula, kyanema bingi ‘Kwikala na Jiso Jijitu.’ Pologalamu wa juba ja kupwila kwiikajila uketukwasha kuba kino.