Juba ja Kupwila Kwiikajila Kubena Kwiya

Umvwe twamona nangwa kumvwa kintu saka kitusopesha pa mambo a malwa abena kwiya, bino twabula kutako muchima, mwakonsha kufuma malwa. Kyakilapo bingi kunema kulondela lutangijilo lo apana Yehoba mu bintu bya ku mupashi. Kino kikambiwapo bingi mu majashi a juba ja kupwila kwiikajila kwa mwaka wa mwingilo ubena kwiya. Kishina kyaamba’mba “Jimukai byo Mumvwa.”—Luka 8:18.

Mu jashi janji jitanshi, ñambi mwenyi ukamba pa lujimuno luji mu byapitala bitanshi bya nkalata ya kwa Paulo yanembeshiwe na mupashi wa Lesa ku Bahebelu, byo lwakonsha kwingila ne kwi atweba lelo jino. Mu Jashi ja kapelampako jiji na mutwe waamba’mba, “Iketainga ku Mafunde a Lesa,” ñambi mwenyi ukakwasha bonse kwipesapesa umvwe kine babena kuteleka kwi Yehoba, ku Mwananji, ne kwi ‘kalume wa kishinka ne wa maana.’—Mat. 24:45.

Mu kuno kupwila, majashi avula kikatakata akakwasha bingi bisemi. Mutwe waamba’mba, “Bisemi Biteleka ku Mambo a Lesa kwa Kubula Kulabikwa” uketukwasha kwizhikijila ku bintu bya ino ntanda byakonsha konawisha bumupashi bwetu. Jikekala ne na misambo ya mepuzho a kwipuzha boba bapimpula bwikalo bwabo kuba’mba batangizheko bintu bya ku mupashi. Mutwe waamba’mba, “Kutelekesha ku Byambo bya Lesa byo Kukosesha Bakyanyike Betu” ukekala na misambo ya mepuzho a kwipuzha bakyanyike bamwesha bulumbuluke bwabo ku bukine pa sukulu, ku bakwabo, nangwa mu mwingilo. Mutwe waamba’mba, “Bakyanyike Bateleka kwi Lesa ne Kufunda” uketukwasha kubula kusula bulume buji na bakyanyike bwa kufunda. Misambo ya mepuzho ikepuzhiwanga ku bakyanyike ne bansemi babo iketukwasha kumona buwame buji mu kufunjisha bakyanyike mashinda a Yehoba kufuma ku bulukeke.

Nangwa kya kuba Satana ubena ‘kujimbaika ba panopantanda ponse,’ bino Yehoba ubena kumwesha bakalume banji bakishinka jishinda jo bafwainwa kwendamo. (Lum. 12:9; Isa. 30:21) Kutelekesha ku lujimuno lwanji ne kwilwingijisha bulongo mu bwikalo bwetu kwitulengela kwikala na maana, kwituletela lusekelo, ne kwitutangijila ku bumi bwa myaka ne myaka.—Mana. 8:32-35.