Nanchi Jiso Jenu Jijitu Nyi?
1. Kwikala na ‘jiso jijitu’ kulumbulula ka?
1 Bintu byo tumona bitulengela kukeba kwibyuba. O ene mambo Yesu o ambijile’mba: “Umvwe jiso jobe jijitu, ne mubiji wobe yense usakwikala watoka.” (Mat. 6:22) Inge jiso jetu ja ku mupashi “jijitu” kwesakana na mwaambijile Yesu, jitatu muchima kuba kintu kimo—kyaswa muchima wa Lesa. Tutangizhako Bufumu kabiji kechi tukeba bintu bya ku mubiji kwitulabika nangwa mingilotu ikwabo kulubankanya mwingilo wetu ne.
2. Ki ka kyakonsha kuvulañanya milanguluko yetu, pano bino ki ka kyakonsha kwitukwasha?
2 Kikebewa Kwipesapesa Atwe Bene: Milanguluko yetu yakonsha kuvulañana kupichila mu kukeba kwikala na bintu byo batentemesha pa mwela ne mu mapepala a byambo nangwa kukeba kwikala na bijipo na bakwetu. Saka tukyangye kukeba kuba nangwa kupota kintu kyakonsha kwitusendela kimye kyabaya, mali avula nangwa ngovu, kyakonsha kuwama ‘kubajila jimo mali akataikilapo’ kupichila mu kwishikisha atwe bene’mba, ‘Nanchi kino kikandengela kwingijila Yehoba bulongo nyi, inyi ne?’ (Luka 14:28; Fili. 1:9-11) Kyawama pa kimye pa kimye kulanguluka pa bintu byo twakonsha kukepeshako mu bwikalo bwetu kuba’mba twingilengako kimye kyabaya mu mwingilo.—2 Ko. 13:5; Efi. 5:10.
3. Tufunjilako ka kwi nyenga wakepesheko bintu bya kuba mu bwikalo bwanji?
3 Nyenga umo byo atendekele bupainiya bwa kimye kyonse, watwajijile na nkito yanji ya kuzhikisha juba nangwa kya kuba wafwainwe kukebapo nkito ingi ibula kusenda kimye kyabaya ya kumwenamo mali a kwikwashishamo. Kulutwe na lwendo waambile’mba: “Kafwako wakonsha kwingijila bankambo babiji ne. Nafuukwilepo kwikalatu na bintu bikebewa kukila kwikala na byavula. Nayukile namba bintu bya ku mubiji bipwa nkito kabiji nakonsha kwikatazhatu umvwe saka ñendatu na kwibikeba.” Kino kyamulengejile kukepeshako bintu bya kuba mu bwikalo bwanji kabiji ne kumonapo nkito yamushilangamo kimye kya kwingila bupainiya.
4. Mambo ka o kyanemena luno kwikala na jiso jijitu?
4 Kuyuka kimye kyo tujimo kwanema bingi mambo kwitulengela kwikala na jiso jijitu. Juba jonse jipita jitufwenyesha kwipi na mpelo ya buno bwikalo kabiji ne ku ntendekelo ya ntanda ipya ya Lesa. (1 Ko. 7:29, 31) Umvwe twata muchima ku mwingilo wa busapwishi, twakonsha kwipulusha atwe bene ne boba bo tusapwila.—1 Timo. 4:16.