Vidyo Ikebewa Kulangulukishapo Bulongo
“Ino vidyo kine ilengela Muntu kulangulukapo!”
“Yamfikile bingi pa muchima!”
“Naumvwine bingi bulanda!”
1 Nanchi byobyo mwaumvwine panyuma ya kutamba vidyo ya Young People Ask—How Can I Make Real Friends? nyi? Myaka imo ya kunyuma kwe, mulongo wakyanyike wapichilenga mu kimye kyakatazha mu bwikalo bwanji, na mambo a balunda nanji boasajile. Bamulengejile kuleka kutemwa bukine ne kutaya bulunda bwanji ne Yehoba. Ko kyakayanga vidyo ya Real Friends yalupwilwe. Wanembele’mba: “Byo natambilenga ino vidyo javula, mipolo yalukumukilengatu mu meso. Nasanchijile Yehoba pa bukwasho bwa pa kimye kyafwainwa.” Vidyo ya mukwashishe kupimpula bwikalo bwanji ne kusala balunda nanji bawama. Wanungilepo amba: “Kya kine bantu banengezhe ino vidyo bayukisha bingi bulongo bintu bibena kupitamo bakyanyike luno.” Anweba bansemi ne anweba bakyanyike, mambo ka a kubujila kutamba ino vidyo kimye kya lufunjisho lwenu lwa kisemi lukalondelapo? Panyuma ya kutamba kipungu kimo, imikai ne kwisambila pamo mu bukishinka kabiji mu meso anteka mepuzho aji mu mapalagalafu alondelapo.
2 Ntendekelo: Mulunda wa kine ye ñanyi?—Mana. 18:24.
3 Mikiika Ipwisha Bulunda: Mwakonsha kushinda byepi kwiumvwa kwa kushalamo mu bibena kuba bakwenu? (Fili. 2:4) Mambo ka o mwafwainwa kuwamishako bumuntu bwenu, kabiji bañanyi bakonsha kwimukwasha kuba kino? Kintu ka kikemulengela kwikala na balunda bavula, kabiji kwepi ko bafwainwa kutanwa?—2 Ko. 6:13.
4 Bulunda na Lesa: Mwakonsha kwikala byepi na bulunda bwa pa muchima na Yehoba, kabiji mambo ka o kyawamina kuba bino? (Sala. 34:8) Bañanyi bakonsha kukosesha bulongo bulunda bwenu na Lesa?
5 Balunda Batama: Balunda batama bo bañanyi? (1 Ko. 15:33) Nga balunda batama bakonsha konauna byepi bumupashi bwa muntu? Kya kumwenako kiji mu Baibolo kya kwa Dina kimufunjisha ka?—Nte. 34:1, 2, 7, 19.
6 Kifwanyikizho kya mu Ano Moba: Mukose wamulengejile Tara kuba ka? Ñanyi bintu byo aambile bya kwibingishilamo kupwanañana na bakyanyike ba ku kyalo? Bizumba ka byo bamubikilemo? Mambo ka bansemi banji o bakankelwe kuyuka kizumba kyo ajingamo, bino bapimpwile byepi milanguluko yabo kuba’mba bamukwashe kubwela jibiji ku mupashi? Nga nyenga painiya wamwesheshe byepi kwikala mulunda wakine kwi Tara? Mambo ka bena Kilishitu o bafwainwa kumvwina Byambo bya Mana 13:20 ne Yelemiya 17:9? Ñanyi lufunjisho lwanema lwafunjile Tara?
7 Kupezhako: Ñanyi mafunjisho o mwafunda mu ino vidyo? Mwakonsha kwiengijisha byepi kukwasha bakwenu?—Sala. 71:17.