“Jishinda Jawama ja Kufunjishishamo”

BA SOO-JEONG ba ku South Korea, bengijisha mavidyo ataanwa pa keyala wa jw.org pa kufunjisha baana ba sukulu kuyuka bya kufuukula bintu bulongo. Baambile’mba: “Baana ba sukulu batemenwe bingi byo batambile vidyo wa Kizungu wa kuba’mba, What’s a Real Friend? Byo bapwishishe kutamba uno vidyo, baambile’mba, ‘Kechi twayukile’mba balunda ba kine byo byo bafwainwa kwikala ne. Jino ke jishinda jawama ja kufunjishishamo.’ Bamo baambile’mba bakayanga pa uno keyala inge kebakebe kuyuka bya kuba mu bwikalo.” Ba Soo-jeong banungilepo’mba: “Ntundaika bafunjishi bakwetu kwingijisha uno vidyo, kabiji nabo batemwa bingi kumwingijisha pa kufunjisha baana ba sukulu.”

Vidyo mukwabo ye batemenwe bingi baana ba sukulu mu South Korea ke wa kuba’mba Kupuma Muntu Uba Kanwa kwa Kubula Kulwa Nanji. Mufunjishi wingila ku kipamo kifunjisha banyike kubula kwikala bakapondo (kitelwa’mba Juvenile Violence Prevention Foundation) watambishe uno vidyo ku baana ba sukulu. Waambile’mba: “Baana ba sukulu bomvwa bingi bulongo kutamba uno vidyo mambo wawama. Kabiji uno vidyo wibafunjisha bya kuba inge muntu ubena kwibakatazha, ne bya kuchinuzhuka muntu uba kanwa.” Kino kipamo kyalombele’mba bekiswishe kwingijishanga uno vidyo pa kufunjisha baana ba sukulu, banyike ne bakulumpe, kabiji bekiswishishe. Nangwatu bakapokola nabo babena kwingijisha mavidyo aji pa jw.org.

Twimutundaika kuyapo pa keyala wa jw.org. Wapeela bingi kushinkula, kabiji mwakonsha kukopolola mavidyo, nyimbo, ne mabuku akwabotu aamba pa bya mu Baibolo kwa kubula kupana mali.