Vidyo wa Bakamonyi ba kwa Yehoba—Bakwatankena Pamo Kusapwila Mambo Awama

Pa myaka 100 yapitapo, Bakamonyi ba kwa Yehoba bakwatankena pamo kusapwila mambo awama. Mu uno mukwekele mukatampe wa kusapwila ubena kubiwa mwaya ntanda lelo jino, tusapwila ano mambo awama mu milaka yavula bingi mu byalo kukila pa 230. (Mat. 24:14) Mambo ka uno mwingilo o anemena? Ubena kwingijiwa byepi mwaya ntanda yonse? Vidyo wa kuba’mba, Jehovah’s Witnesses—Organized to Share the Good News wakumbula ano mepuzho onse kupichila mu kulondolola mwingilo wetu byo abena kwingijiwa mwaya ntanda. Panyuma ya kutamba vidyo, kumbulai ano mepuzho alondelapo.

Uno vidyo wimukwasha byepi kumvwisha bintu ne kwimulengela kumwesha lusanchilo pa mambo a (1) mingilo ibena kwingila jibumba ja Yehoba ya kusapwila mambo awama? (2 Timo. 4:2) (2) bisemi bya pa Betele mwaya ntanda? (3) masukulu a bamishonale ne a bakalama? (2 Timo. 2:2) (4) buneme bwa kubalaula binembelo pa juba pa juba ne kunengezha kupwila kwa kipwilo kwa pa mulungu pa mulungu? (Byu. 17:11) (5) bintu byo tumwenamo mu kutanwa ku kupwila kwetu kwa bwina Kilishitu? (Hebe. 10:24, 25) (6) mapesho o mukekala nao inge ntanda yaikala ke Paladisa? (Isa. 11:9) (7) jishuko jo muji najo ja kwingilako mwingilo wa kunowa ubena kwingijiwa lelo jino?—Yoa. 4:35.

Uno vidyo ke kingijisho kyawama kya kukwashishamo bantu bamwesha lusekelo kuyuka mwingilo ubena kwingijiwa na Bakamonyi ba kwa Yehoba mwaya ntanda. (8) Kimye ka kyakonsha kuwama kutambishamo uno vidyo ku bantu bo tufunjisha Baibolo, bakilongo ne bantutu bakwabo? (9) Bantu bamwesha byepi lusekelo panyuma ya kwibatambisha uno vidyo?

Byo tulanguluka pa bintu Yehoba byo abena kuba, tuswa byambo bya kwa nyimbi wa masalamo byaamba’mba: “Anweba Yehoba Lesa wami, mingilo ya kukumya yo mwaingila yo yavula, ne milanguluko yenu yo mwitulanguluka nayo pamo. Ka paji nangwa umo wa kwimutanchikilayo bulongo ne.” (Sala. 40:5) Twayai twingijishenga bulongo uno vidyo kukwashishamo bantu kuyuka ne kusanchila Yehoba ne jibumba janji!