Mukwekele Mukatampe wa Kusapwila Mwaya Ntanda!
Kukila pa myaka 100, Bakamonyi ba kwa Yehoba bakwatankana bingi kusapwila mambo awama. (1 Ko. 9:23) Mu uno mukwekele mukatampe wa kusapwila mwaya ntanda, tusapwila mu milaka yavula bingi. Tubena kusapwila mu byalo kukila pa 230. (Mat. 24:14) Pano uno mwingilo wanemena ka? Kabiji ubena kwingijiwa byepi mwaya ntanda yonse?
Vidyo ya Jehovah’s Witnesses—Organized to Share the Good News ya kumbula ano mepuzho kupichila mu kulondolola mbaji yavula ya uno mwingilo wetu ubena kwingijiwa mwaya ntanda yonse. Byo musakutambanga ino vidyo, langulukainga pa ano mepuzho: (1) Uno mwingilo wetu unengezhiwa ne kutangijilwa byepi? (2) Nga madipatimenti Anengezha bya Kunemba Mabuku, Atala pa Kutuntulula, Alenga bipikichala, Alenga Maselechi ne Matepu engila byepi kusapwila mambo awama? (3) Nkebelo ka ya kunembela mabuku ne kwiatuma ku mapunzha avula? (Yoa. 17:3) (4) Mabuku anga anembwa pa mwaka umo? (5) Nga mabuku etu alumbulula Baibolo aingila ñanyi mwingilo? (Hebe. 4:12) (6) Ki ka kibena kubiwa kukwashishamo ku mupashi aba bonse babula kumona ne kumvwa? (7) Nga mwingilo wetu ukwashiwa byepi mu bya mali? (8) Tumwenamo byepi mu mingilo ya ba mu Dipatimenti Ipana Mabulañano a bya mu Bipatela (Hospital Information Services), Dipatimenti itala pa bibena kwenda Mwingilo (Service Department), Dipatimenti inengezha kupwila kwa Nkambi (Convention Department)? (9) Byo muji Kamonyi wa kwa Yehoba, ino vidyo imukwasha byepi kumvwisha (a) mingilo yo jibena kuba jibumba ja Yehoba kusapwila mambo awama? (b) bisemi bya Betele byakila pa 100 mwaya ntanda? (c) lufunjisho lwanengezhiwa kufunjisha bakulumpe mu bipwilo ne bamishonale? (d) buneme bwa kutendeka juba jonse na kubalaula kinembelo kya juba ne kunengezha kupwila kwa mulungu ne mulungu? (e) mfweto iji mu kutanwa ku kupwila kwetu kwa bwina Kilishitu? (f) Paladisa wa panopantanda byo akekala? (Isa. 11:9) (g) kwingilako uno mwingilo wa kunowa ubena kwingijiwa?—Yoa. 4:35.
Ñanyi bintu byawama byo mwaumvwapo byaambilepo balongo benu ba ku mubiji, bakwenu, bantu botubwelako ne botufunjisha Baibolo panyuma ya kutamba ino vidyo? Kyakonsha kuwama lonka luno kwiitambishako bantu bakwabo ne kwibasapwila ano mambo awama.—Mat. 28:19, 20.