Kwashai Bantu Kwikala Balunda na Lesa
1 Lelo jino, bantu kufuma mu mikoka yonse babena kufunda mashinda a Yehoba. (Isa. 2:2, 3) Pano bino, bantu ba uno mutundu pa kuba’mba ‘bapange bipangwa saka batekanya nangwa’mba saka bachinchika,’ bafwainwa patanshi kutemwa Yehoba. (Luka 8:15; Mako 12:30) Kwa kubula butemwe bwayiwe musango, kechi bakonsha kwikala na bulume bwa kushinda byubilo byatama bya ino ntanda nangwa ngovu ya kuba kintu kyawama ne. Jishinda jimo ja kukwashishamo bantu kwikala na bulunda bwawama na Yehoba, ke kupichila mu kwibakwasha kubayishako butemwe bwabo bwa kutemwa byubilo byanji. Batundaikai kulangulukishapo pa byambo biji mu buku wa Fwenyai Kwipi ne Yehoba.
2 Kya Kumwenako Kyenu: Byubilo byenu byawama byakonsha kwibafika bingi pa muchima bo mufunjisha Baibolo. Inge bamona kuba’mba mwanemeka bingi bulunda bwenu ne Yehoba ne kumona byo bwaalula bwikalo bwenu, nabo bakonsha kutundaikwa kwikala na bulunda bwa musango yenkawe. (Luka 6:40) Ee kine, byubilo byetu bifika bantu pa muchima kukila byo twamba.
3 Jishinda jakilamo kunema jingijisha bansemi pa kufunjisha baana babo kuba’mba batemwe Yehoba ke kupichila mu kya kumwenako kyabo. (Mpitu. 6:4-9) Bamulume ne mukazhi bakebelenga kukomesha baana babo mu bukine, baipwizhe bansemi bakomeshapo kala baana mu bukine kuba’mba bebabuleko bya kuba. Nsemi wa mulume waambile’mba: “Bantu bavula bo nesambile nabo baambile kuba’mba kintu kyanema ke kya kumwenako kya bansemi.” Onkao mambo, mu bwikalo bwabo bonse, bansemi bakonsha kwikala bakumwenako baana babo pa byo kilumbulula kwikala “mulunda na Lesa.”—Yako. 2:23.
4 Lulombelo lwa Kufuma Panshi ya Muchima: Kabiji mwakonsha kukwasha bantu kukomesha bulunda bwabo na Yehoba kupichila mu kwibafunjisha bya kulomba kufuma panshi ya muchima. Mwakonsha kwibabula lulombelo lwa kumwenako lwa kwa Yesu, ne milombelo ikwabo ya mukoyo yanembwa mu Binembelo. (Mat. 6:9, 10) Mwakonsha kufunjisha baana benu ne bomufunjisha Baibolo bya kulomba kupichila mu kuteleka ku milombelo yenu. Umvwe baumvwa byambo byenu bya kufuma panshi ya muchima, bakonsha kuyuka byo mwiumvwa pe Yehoba. Batundaikai ‘kukelwa mu lulombelo’ umvwe ke batalañane na meseko. (Loma 12:12) Yehoba byo abena kwibakwasha mu bimye bya malwa, bakatendeka kwikala na luketekelo mwi aye kabiji ne kumutemwa kwikala mulunda wabo wa kine kine.—Sala. 34:8; Fili. 4:6, 7.