Anweba Bakyanyike—Mukobapo ka mu Bwikalo Bwenu?
1 Nsongwakazhi umo waambile’mba: “Nkeba kwikala bingi bulongo mu bwikalo bwami.” Kwa kubula nangwa kuzhinaukatu ne, ne anweba byo byo mukeba. Pano mwakonsha kwikala byepi “bulongo” mu bwikalo bwenu? Kampe pa waileshi ne pa televizhonyi, balunda nenu, kubikapotu ne bafunjishi benu bakonsha kwimubula’mba umvwe muntu waikala na mali avula, na nkito ya mushingi, ne kwikala munonshi wakonsha kwikala bulongo mu bwikalo bwanji.
2 Nangwa byonkabyo, Baibolo ujimunako bakyanyike kuba’mba kukebesha bintu bya ku mubiji ke “kukabakanatu nobe kujatu mwela.” (Sapwi. 4:4) Kishinka kimo ke kya kuba’mba, bakyanyike bachechetu bo bekala banonshi ne kutumbalala. Aba bekala banonshi ne kutumbalala javula kibafita bingi ku muchima umvwe bintu byabula kubiwa monka mo baketekejilenga. Mwanyike umo wa ku kyalo kya Britain wakebeshenga nkito ya peulu waambile’mba: “Kwikala munonshi kujitu nobe kibokoshi mwabula kintu. Umvwe watalamo kafwamo ne kijimotu ne.” Kya kine, kimo kimye nkito yakonsha kuleta bunonshi ne kutumbalala. Bino kechi yakonsha kwimulengela kumwenamo “ku mupashi” ne. (Mateo 5:3, NW) Kabiji, mu 1 Yoano 2:17 betujimunako kuba’mba “panopantanda pakapita.” Nangwa kya kuba mwakonsha kwikala munonshi mu ino ntanda, bino ke kwa kakimyetu kacheche.
3 Byo Mwakonsha Kwikala Kamonyi wa kwa Yehoba: Patanshi, mwafwainwa kwikala na kizaku kya kusaka kwingijila Lesa. Bino kino kizaku kechi kiyatu nobe meno a mu kanwa nangwa kya kuba bansemi benu bena Kilishitu ne. Anweba bene mwafwainwa kwikala mulunda na Yehoba. Nsongwakazhi umo waambile’mba: “Lulombelo lukwasha bingi muntu kwikala mulunda na Yehoba.”—Sala. 62:8; Yako. 4:8.
4 Loma 12:2, waamba pa kintu kikwabo kyo mwafwainwa kuba. Waamba’mba: “Mukayukenga kyaswa muchima wa Lesa, akya kyawama, ne kyaitabilwa, ne kyalumbuluka.” Abya nanchi mwakizhinaukapo kala bintu bimo byo bemufunjisha nyi? Umvwe mwakizhinaukapo kala, mwafwainwa kulondela lujimuno lwa mu Baibolo ne ‘kuyuka anwe bene’ amba abyo bintu byo bya kine! Sa mwipesela pesela anwe bene. Tangainga Baibolo ne mabuku alumbulula Baibolo. Bino, kufunda pe Lesa kechi kulumbulula kutanga bishinka konkatu ne. Ikalaipo na kimye kya kulanguluka langulukapo pa byo mubena kutanga pa kuba’mba bimufike pa muchima wenu wa bukifwanyikizho. Kino kikalengela butemwe bwenu bo mwatemwa Lesa kukomenako.—Sala. 1:2, 3.
5 Kikwabo, esekainga kubulako bakwenu byo mubena kufunda, nabiji boba bo mufunda nabo sukulu. Kikalondelapo ke kusapwila ku nzubo ne nzubo. Kimo kimye mwakonsha kusambakana na ye mufunda nanji sukulu kimye kyo mubena kusapwila kabiji kino kyakonsha kwimulengela kumvwa bumvu. Bino Baibolo witukambizha kubula kubila “bumvu mambo awama.” (Loma 1:16) Mubena kutwala mambo a bumi ne luketekelo! Kechi mwafwainwa kwiobila bumvu ne.
6 Umvwe bansemi benu bena Kilishitu, kimo kimye mwatatula ne kala kwingila nabo mu uno mwingilo wa busapwishi. Pano, abya mwambapo kukila kwimanatu nzoo pa kibelo ne kusha magazini nangwa matalakiti nyi? Nanchi mwakonsha kusolomoka mwina nzubo bunke bwenu ne kumufunjisha bya mu Baibolo nyi? Umvwe ne, ambilai bansemi benu nangwa muntu umo mu kipwilo wakoma ku mupashi emukwasheko. Ibikilai kikonkwanyi kya kwikala musapwishi wa mambo awama wabula kubatizwa!
7 Pa lubatizhilo po po mwikala ke Kamonyi wa kwa Yehoba. (Isa. 43:10) Kino kyafwainwa kulamata byonse byo mukobanga mu bwikalo bwenu. Kwipana kuvwangamo ‘kwikana anweba bene.’ (Mat. 16:24) Kimo kimye mwakonsha ne kusulako bintu bimo byo musakisha kuba ne ‘kukebesha bufumu bwa Lesa.’ (Mat. 6:33) Kwipana ne lubatizhilo bikemushinkwila jishinda ja kwingijilamo mingilo yavula. Twayai tumonepo mingilo imo.
8 Mingilo ya Kimye Kyonse yo Mwakonsha Kwingijila Lesa: Bupainiya ke mwingilo umo ye mwakonsha kwingila. Painiya ke musapwishi mwina Kilishitu wabatizwa uji na byubilo byawama winengezha kwingila maawala 70 na kusapwila mambo awama pa ñondo pa ñondo. Kwingila kimye kyabaya mu bujimi kukemukwasha kwikala musapwishi kabiji mufunjishi wawama. Bapainiya bavula batana bingi lusekelo mu kukwasha boba bo bafunjisha Baibolo kwikala Bakamonyi babatizwa. Nkito ka ya ku kyalo yafwainwa kwimuletela lusekelo ne mutende kukila bupainiya?
9 Sukulu ya Lufunjisho lwa Mwingilo yaikelako kufunjisha bakulumpe ne bankwasho mu kipwilo bafikapo kabiji babula kutwela mu masongola. Pa milungu itanu na isatu, bafunda mingilo ya bukulumpe ne ya bunkwasho mu kipwilo, bingila jibumba ja Yehoba, ne bya kwamba ku mvula bantu. Umvwe bapwisha kufunda, bamo bebatuma kuya na kwingijila monka mu byalo byabo. Bakwabo nabo bebatuma mu byalo bingi.
10 Mwingilo wa pa Betele ke mwingilo wa kwitemenwa wa kwingijila pa musampi wa Bakamonyi ba kwa Yehoba. Bamo ba mu kisemi kya Betele bengila mwingilo wa kunengezha mabuku alumbulula Baibolo. Bakwabo nabo bengila mwingilo wa kukwasha nabiji kuwamisha bishimikwa ne bipe, nangwa kunengezha bya ku mubiji bikebewa ku ba mu kisemi kya Betele. Ino mingilo yonse yanema bingi kwi Yehoba. Kabiji, baji pa Betele baji na lusekelo byo bayuka kuba’mba byonse byo boba, bikwasha balongo babo mwaya ntanda yonse.
11 Ingijilainga Yehoba na Muchima Yense: Kwingijila Yehoba kyo kintutu kyawamisha kyo mwakonsha kuba mu bwikalo bwenu. Nga mambo ka a kubula kwibikila kikonkwanyi kya kwingijila Lesa mu mwingilo wa kimye kyonse? Isambaipo pa mwingilo wa kimye kyonse na bansemi benu, bakulumpe mu kipwilo kyenu ne na mukulumpe wa kijiiji. Umvwe mubena kukebesha kwingijila pa Betele, nangwa kuya ku Sukulu ya Lufunjisho lwa Mwingilo, mwakonsha kutanwa ku kipwilo kikalako kya boba bakeba kuba bino, pa kupwila kwa kijiiji ne kwa nkambi.
12 Pano bino, kechi bonse bakonsha kwitabizhiwa nangwa kukonsha kwingila mwingilo wa kimye kyonse ne. Kimo kimye, bamo bakonsha kukankalwa na mambo a kubelabela, lukatazho lwa mali kabiji ne mutembo wa kulama kisemi. Nangwa byonkabyo, bena Kilishitu bonse bepana bafwainwa kumvwina lujimuno lwa mu Baibolo lwa kuba’mba: ‘Ukamutemwe Nkambo Lesa wobe na muchima wobe yense, ne na mweo wobe yense, ne na maana obe onse.’ (Mat. 22:37) Yehoba ukeba anweba kumwingijila kwesakana na papelela bulume bwenu. Onkao mambo, teshaitu muchima ku kwingijila Yehoba kechi na mambo a bwikalo bwenu byo buji ne. Ibikilai kikonkwanyi kya kwingijila Lesa mu mingilo yo mwakonsha kwingila. Kine, ‘sa muvuluka Mulenga wenu mu moba a bwanyike bwenu’ kabiji umvwe mwauba byobyo, Yehoba ukemupesha myaka ne myaka!