“Aye Upana Bulume ku Batembuka”
1 Atweba bonse pa bimye bimo tumvwa kukoka. Kechi tukokatu na mambo a kwingila mingilo yonka ne, bino tukoka ne na mambo a makatazho o tupitamo mu bino “bimye byakatazha.” (2 Timo. 3:1) Byo tuji bakalume ba Yehoba, twikala byepi na bulume bwa ku mupashi bukebewa pa kuba’mba tubulenga kubwela panyuma mu mwingilo wetu? Tuba bino kupichila mu kuketekela mwi Yehoba ‘wakosa mu bulume.’ (Isa. 40:26) Wayuka bulongo byo tukeba kabiji ukebesha bingi kwitukwasha.—1 Pe. 5:7.
2 Lunengezho lwa Yehoba lwa Kwitukwasha: Yehoba witukosesha kupichila mu mupashi wanji wazhila, bulume bubula kukankalwa bonka bo aingijishe pa kulenga bintu byonse. Umvwe twakoka, mupashi wa Lesa witukwasha “kutambula bulume bupya.” (Isa. 40:31) Akiipuzhai anwe bene’mba, ‘Kimye ka kyo nalombelepo mupashi wazhila kunkosesha kwingila mingilo yami ya bwina Kilishitu?’—Luka 11:11-13.
3 Umvwe ke tutange ne kulanguluka langulukapo moba onse pa Mambo a Lesa anembeshiwa na mupashi kabiji ne kuja kajo ka ku mupashi kimye kyonse kupichila mu kufunda mabuku etu a bwina Kilishitu, tukekala nobe “kichi kyo bajimba ku mikola ya mema, kipanga ne bipangwa byakyo monka mu kimye kyakyo, ne mabula akyo kechi alela ne.”—Sala. 1:2, 3.
4 Kabiji Yehoba wingijisha ne bakwetu ba mulwitabilo kwikala ba ‘kwitukosesha michima.’ (Kolo. 4:10, 11) Betukosesha pa kupwila kwa kipwilo kupichila mu misambo yabo itundaikañana, mikumbu, kabiji ne mu majashi abo. (Byubilo 15:32) Kikatakata, bakulumpe mu kipwilo ba bwina Kilishitu, bapana bukwasho bwa ku mupashi kabiji ne lutundaiko.—Isa. 32:1, 2.
5 Mwingilo: Umvwe mwatendeka kumvwa kukoka, kange muleke kusapwila ne. Kupusanako na mingilo ikwabo yavula, kwingilako kimye kyonse mu mwingilo kwitukokolosha bingi. (Mat. 11:28-30) Kusapwila mambo awama kwitukwasha kutangizhako Bufumu bwa Lesa kabiji ne kutwajijila kuketekela milaye yawama ya mu kimye kya kulutwe.
6 Kuji bintu byavula bingi bya kuba buno bwikalo bubi saka bukyangye konaunwa. Tuji na bishinka byavula bya kwitulengela kutwajijila kwikala bakosa mu mwingilo wetu kwesakana na “bulume bo apana Lesa.” (1 Pe. 4:11) Na bukwasho bwa Yehoba tukapwisha kwingila mwingilo wetu, mambo ye “upana bulume ku batembuka.”—Isa. 40:29.