“Kwikomesha na Byambo bya Lwitabilo”
1 Kwikala bwikalo bwa munema wa kunemeka Lesa kukebewa kwibikako bingi. (1 Timo. 4:7-10) Na ngovu yetu, twakonsha kukoka ne kupona pa kulonda bwikalo bwa uno mutundu. (Isa. 40:29-31) Jishinda jimo jakonsha kwitukwasha kutainamo ngovu kufuma kwi Yehoba ke kupichila mu “kwikomesha na byambo bya lwitabilo.”—1 Timo. 4:6.
2 Kajo ka ku Mupashi Kavula: Yehoba unengezha kajo ka ku mupashi kavula kupichila mu Mambo anji ne mu ‘kalume wa kishinka ne wa maana.’ (Mat. 24:45) Nanchi tubena kwibikako kuba’mba tumwenemo mu kano kajo nyi? Abya tutanga Baibolo pa juba pa juba nyi? Nanchi twaabanya kimye kya kubilamo lufunjisho lwa pa bunke ne kya kulangulukalangulukapo nyi? (Sala. 1:2, 3) Kuja kajo kawama ka ku mupashi mu jino jishinda kwitukosesha kabiji ne kwituzhikijila ku bintu bikokeshañana bya ino ntanda ya kwa Satana. (1 Yoa. 5:19) Umvwe sa tulanguluka pa bintu byawamisha ne kwibingijisha mu bwikalo bwetu, Yehoba ukekala ne atweba.—Fili. 4:8, 9.
3 Kabiji Yehoba witukosesha kupichila mu kupwila kwa kipwilo. (Hebe. 10:24, 25) Mikambizho ya ku mupashi ne kupwanañena pamo kwawama kutanwa pa kupwila kwitukwasha kwimana bakosa mu bimye bya meseko. (1 Pe. 5:9, 10) Nsongwakazhi umo mwina Kilishitu waambile’mba: “Juba jonse jizhikila ku sukulu, kabiji nkoka bingi. Pano bino kupwila kuji nobe kizhiba kya mema mu kiselebwa, kabiji kunkwasha kuya ku sukulu juba jikwabo jalondelapo.” Byo twashukwapo pa mambo a kwibikako kwetu kwa kutanwa ku kupwila!
4 Kusapwila Bukine: Kusapwila ku bantu kwajingatu nobe kajo kwi Yesu. Kwamukoseshanga bingi. (Yoa. 4:32-34) Mu jishinda jimotu, inge ne atweba twabulako bakwetu milaye yawama ya Lesa, twikala na bulume jibiji. Kabiji kupayankana mu mwingilo kulengela muchima ne milanguluko yetu kutesha maana pa Bufumu ne pa mfweto ijitu pepi kufika. Kine kwitukokolosha bingi.—Mat. 11:28-30.
5 Byo twatokwapo pa kumwenamo mu kano kajo kavula ka ku mupashi Yehoba ko abena kunengezhela bantu banji lelo jino! Twayai tutwajijile na kwimba na lusekelo mu kumuletela lukumo.—Isa. 65:13, 14.