Ikalai na Miteeto Yawama, Nowai Bibusa Byavula
1. Mambo ka o kyanemena kupitulukamo jikwabo mu mutanchi wetu wa ku mupashi?
1 Kimye kitanshi kyo mwaikele bena Kilishitu, kwakubula nangwa kuzhinaukatu ne, mwibikileko bingi kwikala na mutanchi wawama wa mingilo ya ku mupashi amo mwavwangiwe lufunjisho lwa Baibolo, kupwila kwa bwina Kilishitu, mwingilo wa mu bujimi, ne lulombelo. Na mambo a bibusa bya Yehoba bya kwibikako kwenu, mwakomejileko ku mupashi. Kampe papita myaka yavula bingi kufuma kimye kyo mwabatizwe. Nanchi mubena kutwajijila na miteeto yawama ya ku mupashi yo mwajinga nayo panyumatu ya kwikala mwina Kilishitu nyi?
2. Tumwenamo byepi mu kutanga Baibolo pa juba pa juba?
2 Pitulukaimo Bulongo Jikwabo mu Mutanchi Wenu: Nanchi muteeto wenu wa kutanga kibese kimo kya Mambo a Lesa pa juba pa juba nyi? Mukanowa bibusa byavula mu kuba kino! (Yosh. 1:8; Sala. 1:2, 3) Mu Isalela wa ku kala, mfumu yense wafwainwe kutanganga mu buku wanji wa mizhilo “moba onse a bumi bwanji.” Bibusa ka byafumangamo? Wafundanga kwikala na muchima wa kwikepesha ne kufunda kuchina Yehoba pa kuba’mba abule kufuma ku mikambizho Yanji. (Mpitu. 17:18-20) Mu jishinda jimotu, ne ano moba, kutanga Baibolo pa juba pa juba kwitukwasha kutwajijila kwikala babula biko kabiji babula kaneneno kaji konse mu ino ntanda ibi, kabiji yaluwankana. Kabiji kitukwasha kwikala benengezha kwingila mwingilo.—Fili. 2:15; 2 Timo. 3:17.
3. Bibusa ka byo tumwenamo mu kutanwa ku kupwila kimye kyonse?
3 Yesu wajinga na muteeto wa kuya ku nshinagoga, ako kwaikalanga kwisamba pa Binembelo. (Luka 4:16) Kwakubula nangwa kuzhinauka ne, kino kyamukoseshe kutalañana na meseko aji onse o ashile kupitamo. Ne atweba tukoseshiwa kupichila mu mikambizho ipanwa pa kupwila kwa kipwilo ne mu ‘kwikwasha atwe bene na bene’ kwawama. (Loma 1:12) Kupwila pamo na balongo betu kwitukwasha kuchinchika makatazho a mu ano moba a kupelako. (Hebe. 10:24, 25) Abya ukiji muteeto wenu wa kutanwa ku kupwila konse nyi?
4. Tumwenamo byepi mu kwingilako mwingilo wa mu bujimi mulungu ne mulungu?
4 Binembelo bitubula amba batumwa baingilanga mwingilo wa kusapwila mambo awama ‘moba onse mu nzubo ya Lesa ne ku nzubo ne nzubo.’ (Byubilo 5:42) Nangwa kya kuba kechi twakonsha kusapwila juba ne juba ne, mwane lekai ekale muteeto wetu wa kwingilako mu mbaji imo ya mwingilo wa kusapwila mulungu ne mulungu. Kupichila mu kuba bino, tukayuka bingi bulongo bya kwamba Mambo a Lesa, kabiji tukekala na bya kushimikizha bakwetu bitundaikañana bya bukine bwa mu Baibolo.
5. Mambo ka o kyanemena kulomba kwi Yehoba jonse?
5 Ngauzhi Danyela wapeshiwe bingi na mambo a kwingijila Yehoba “moba onse” mu bwikalo bwanji bonse. Kino kyavwangilemo muteeto wa kulomba jonse kwi Yehoba. (Da. 6:10, 16, 20) Mu jishinda jimotu, umvwe ke twiye kwi Yehoba mu lulombelo lwa kufuma panshi ya muchima, uketupa mupashi wanji wazhila. (Luka 11:9-13) Kunungapo, Yehoba ukakumbula kupichila mu kufwenya kwipi ne atweba, kwituswisha kwikala na bulunda bwakosa ne aye. (Sala. 25:14; Yako. 4:8) Byo aikalapo mapesho awama! Onkao mambo, nanchi, twayayi twingilenga na ngovu kutwajijila kwikala na miteeto yawama ya ku mupashi ne kunowa bibusa byavula kufuma kwi Yehoba.