Nanchi Mubena Kumwenamo Nyi?

¹ Bantu bavula lelo jino bakeba kuyuka bya kupwisha makatazho ne kwiyowa bwikalo bwa lusekelo. Babalaula mu mabuku afunjisha pa bwikalo nangwa kwipuzha tubungwe tumo kwibabulako mana pa byo bafwainwa kuwamisha bwikalo bwabo. Kampepo bamo bakonsha ne kushimikizha byo bamwenamo. Nangwa byonkabyo, kutajisha pa bwikalo bwa ano moba, nanchi abya bantu mu kimvwange bafunda kwiyowa mutende ne kwikushiwa mu bwikalo bwabo kupichila mu kufunda mana a buntunshi nyi? Ayo ke milanguluko yatutu!—1 Ko. 3:18-20.

² Ku lubaji lukwabo, Mulenga wetu upana mikambizho ya mana ku bonse batelekako kwa kubula kwibalipilisha. Yehoba ukeba muntu yense kumwenamo mu lufunjisho lwanji. Mu bupanyi wapana Kyambo kyanji kyapuyiwamo kutangijila bantu mu bololoke, kabiji waswisha mambo awama a Bufumu bwanji kusapwilwa pano pa ntanda ponse. (Sala. 19:7, 8; Mat. 24:14; 2 Timo. 3:16) Bwikalo bwa lusekelo lwa kine bwashinkamana pa kuta mana ku mikambizho ya kwa Yehoba.—Isa. 48:17, 18.

³ Buntangi bwa kwa Yehoba bwakijisha mu kuwama kukila buntangi bonse bwa mu mabuku anembwa na bantu nangwa na tubungwe twamana a pano pa ntanda. Twafwainwa kukwashiwa bulongo ne kumwenamo pakatampe umvwe saka twingijisha lunengezho lwa kwa Yehoba luji mu Kyambo kyanji kabiji lufunjishiwa kupichila mu jibumba janji.—1 Pe. 3:10-12.

⁴ Mwenaimo mu Kupwila kwa Kipwilo: Lelo jino, Yehoba usekela bingi mu kwitufunjisha mashinda anji kabiji tumwenamo mu kumvwina mikambizho yanji. Kupwila kwetu kutanu ko twikala nako kila mulungu kumwesha Yehoba byo etutemwa. Kuyuka Lesa kwetu kukomenako, kimye kyo tutanwa ku kupwila kwa kipwilo. Tufunda bya kwivimbila ku byatama kupichila mu kufwenya kwipi ne Lesa. Mu jino jishinda michima yetu itundaikwa.

⁵ ‘Kubaisha michima’ ke kintu kikwabo kyo twakonsha kumwenamo mu kupwila kwa kipwilo. (2 Ko. 6:13) Kino kivwangamo kwiyuka na bantu bakwetu mu kipwilo. Tumwenamo mu kwikosesha atwe bene na bene kwesakana na nkalata yanembele mutumwa Paulo ku bena Loma. (Lo. 1:11, 12) Pa kunembela Bahebelu wibakambizhizhe na mukoyo aba batatwile kunungulula muteto wa kuleka kupwila pamo kwa Bwina Kilishitu.—Hebe. 10:24, 25.

⁶ Lusekelo lukatampe mu bwikalo lwikalako kupichila mu kuta mana ku bakwetu. Tutundaikwa kukeba mashinda o twafwainwa kusangajikilamo bakwetu. Onkao mambo, kupwila kwetu kwa Bwina Kilishitu kwaikelako kumwenamo kwetu ne kumwenamo kwa bakwetu bo tupwila nabo. Kwikalamo na lubaji lufuma panshi ya muchima ko kukebewa kwi atweba.

⁷ Mutumwa Paulo waambilepo bya yenka uno musango pa kufunda Timoti kuba’mba: “Uba bya kwikosesha obe mwine ulumbuluke mu [kupopwela Lesa, NW].” (1 Timo. 4:7) Twafwainwa kwiipuzha kuba’mba: ‘Nanchi mbena kwikosesha amu mwine nyi? Nanchi mbena kubapo bimo kya kuba samwenamo mu byo mfunda pa kupwila kwa kipwilo nyi?’ Twakonsha kwitaba’mba ee umvwe tuta mana ku byambiwa pa kupwila kabiji twafwainwa kweseka kwingijila mwayila byo tufunda. Na meso a ku mupashi twafwainwa kuyuka kuba’mba byambo byo babena kufunjisha balongo, kechi byambo byabo ne, byo byambo bya mwine Yehoba aye Mufunjishi Mukatampe wa bantu banji.—Isa. 30:20.

⁸ Sukulu ya Butumwa bwa Teokalasi ne Kupwila kwa Mwingilo: Kuno kupwila kubiji kwaikelako kwitukwasha kwikala bafikapo mu butumwa bwa Bwina Kilishitu. Sukulu ya Butumwa bwa Teokalasi ke sukulu umo mwikala basambi batambwila mikambizho ne kufundañana kwa mana pa kimye ne pa kimye. Bano basambi bekala na jishuko ja kumwesha kununguluka kwabo kwa kwikala bañambi ba pa mvula-bantu kabiji bo bafunjishi ba Kyambo kya kwa Lesa. Pa kuba’mba mumwenemo byavula mu uno sukulu, mwafwainwa kunembesha, kutanwako, kwivwangamo kimye kyonse ne kuta muchima ku mbaji yenu. Kumvwina ne kwingijisha kufunda kupanyiwa kukemukwasha kununguluka.

⁹ Kupwila kwa Mwingilo kwitufunjisha buneme bwa butumwa bwa Bwina Kilishitu ne kumwesha byo twafwainwa kwingila mu mwingilo wa kulenga bana ba bwanga. Nanchi anweba ne kisemi kyenu mumwenamo pakatampe mu majashi ambiwa pa kuno kupwila kubiji nyi? Bamulume ne mukazhi ba Bwina Kilishitu bamo baambile kuba’mba: “Pa Kupwila kwa Mwingilo kumo twaumvwine kuba’mba twafwainwa kutanganga kinembelo kya kila juba mu kisemi. Kala kechi twatanganga ne, pano luno twatendeka kuba byonkabyo.” Nanchi bamwenamo byepi? Baitabile kuba’mba: “Twatana’mba misambo ikalako kimye kya kuja iwama. Luno kimye kya kuja kechi pekala kiwowo ne.” Nanchi bana babo bacheche nabo bamwenamo mu kupwila nyi? Ee bamwenamo. Bainabo bashimuna’mba: “Kwakubula nangwa kuzhinaukatu ne, bana betu bafunda byavula bingi pa kupwila. Mulungu umo twaumvwine mwanetu wamulume wa myaka ya kusemwa 7 saka abepa bubela. Bino jashi ja kufunda ja yewo yenka mulungu jaambilenga pa bubela. Waumvwine bingi bumvu, watala bashanji kabiji wakunyika ne kilungi kyanji panshi katonkaule pa kipona. Waumvwine kuba’mba bulela bwatama, kabiji kufumatu kyonkakya kimye kechi ubwezhapo kubepa bubela ne.”

¹⁰ Nyenga painiya waambile kuba’mba usekela bingi pa mikambizho ya kuwamishako butumwa bwetu ipanyiwa pa Kupwila kwa Mwingilo. Mambo ka? Walondolola kuba’mba: “Kimye kimo ñumvwa mukose, ndanguluka kuba’mba mikambizho iji mu Butumwa Bwetu bwa Bufumu kechi yakonsha kwingila ne. Bino pa Kupwila kwa Mwingilo umvwe naumvwa bakosesha kuba’mba twafwainwa kwesekako kwingijisha ino mikambizho, kikala nobe basonselako mujilo kabiji ngikala na kizaku kya kwiingijisha. Umvwe nauba byo byo neyowa bingi kwingila butumwa!” Pa milungu yavujilako waesekele kulondela mikambizho imo pa bya kutendeka jisambijilo ja Baibolo pa kufwakasha kutanshi. Kyapeleleko watendekele jisambijilo pa kufwakasha kutanshi ku nsongwakazhi walombelenga kuba’mba muntu umo akamufwakashishepo.

¹¹ Umvwe mwaumvwa jashi jibena kwamba pa kufunda kwa Baibolo kwa kusalapo kwa kyenu kyenu, nanchi muyuka kuba’mba Yehoba ye ubena kwamba kwi anweba nyi? Mulongo umo byo byo eumvwine. Waambile’mba: “Katatakatu pa kupwila kumo, pajinga jashi jaambile mulongo umo pa bya kusangajika byawama ne byatama ku bena Kilishitu. Natemenwe bingi kutamba kisela kya ma bokoseni pa TV. Bino kufumatu pa kuno kupwila, namwene kuba’mba kino kisela kiji pa bya kisangajimbwe byatama ku Bena Kilishitu. Onkao mambo pa kino kimye naleka kutamba kino kisela.” Ee, nangwa kya kuba uno mulongo watemenwe kutamba bya bumbanzhi, wikepeshe ne kulondela kufunda kwa kwa Yehoba.—Sala. 11:5.

¹² Kupwila kwa Mvula-bantu, Jisambijilo ja Ulupungu lwa kwa Kalinda ne Jisambijilo ja Buku pa Kipwilo: Majashi o tumvwa kila mulungu amba pa mitwe yapusana-pusana ya mu Baibolo. Kika kyo mubena kufunda mu ano majashi? Mwanamulume umo Mwina Kilishitu wasongola waambile pa byo afunjile kuba’mba: “Jashi jimo ja mvula-bantu jakonkomwejile pa bipangwa bya ku mupashi. Ñambi waambile kuba’mba aye byo oba pa kuba’mba engijilepo pa kunungulula bino bipangwa, usalapo kipangwa kimo ne kutatula kweseka kwingijilapo mu mulungu umo. Mulungu inge wapwa wikala panshi ne kulanguluka pa byo aingila mu kumwesha kyo kyo kipangwa mu bwikalo bwanji bwa kila juba mukachi ka yewo mulungu. Kepo atatula kwingijila pa kipangwa kikwabo mu mulungu walondelapo. Natemenwe ino ñiñijilo kabiji ne amiwa natatwile kuba byonkabyo.” Shenu uno mulongo waingijilepo bingi bulongo pa byo afunjile!

¹³ Jisambijilo ja Ulupungu lwa kwa Kalinda jitufunjisha kulondela mafunde a mu Baibolo mu byubilo byapusana-pusana bya mu bwikalo bwetu. Bino byambo bitukwasha kwilama kechi mambo na bya kutabataba bya mu bwikalo ne. Kabiji Ulupungu lwa kwa Kalinda lwitukwasha kwendela pamo na kine kibena kuya na kununguluka. Ku kya kumwenako, nanchi kechi twamwenenemo mu masambijilo aambilenga pa ino mitwe ya kuba’mba: “Ifi Fintu Fili no Kwisa,” “Uulebelenga Eluke” ne “Beni Abalola Kabili Abapikintika” mu Ulupungu lwa kwa Kalinda lwa May 1, 1999 ne nyi? Nanchi ano masambijilo a alwile byepi bwikalo bwenu? Nanchi bwikalo bwenu bubena kumwesha kuba’mba mwaumvwine lujimuno lwa kwa Yesu pa bikobiwa kulutwe nalwendo nyi? Nanchi mubena kwinengezha ku meseko akeya kulutwe byo mukamona “kya bunya kileta lonaiko ... sa kyaimana mwazhila” nyi? Nanchi byo munengezha kuba ne byo muba mu bwikalo bwenu bimwesha kuba’mba kechi mwatesha muchima ku bya ku mubiji ne, bino mwata muchima pa kuzhijika jizhina ja Yehoba nyi? Nanchi pa jisambijilo ja Ulupungu lwa kwa Kalinda, kechi tufunda kuba’mba tumwenemo atwe bene mu ano moba ne nyi?

¹⁴ Langulukai pa byo tufunda kila mulungu pa Jisambijilo ja Buku pa Kipwilo. Luno tubena kufunda buku wa mu Baibolo wa Danyela. Pa bañondo bana bo tubena kufunda uno buku, nanchi kechi tumona lwitabilo lwetu kukomenako kila mulungu ne nyi? Kupasha ngauzhi Danyela mutemwe wa Yehoba, tukosesha lwitabilo lwetu pa kuba’mba tuchinchike.

¹⁵ Yehoba Witufunjisha Kwikala ba Lusekelo: Tukachinuzhukanga makatazho umvwe twalondela mikambizho ya kwa Lesa. Mu kunungapo, tukasekela mu bwikalo bwetu. Byo tutangijilwa na Yehoba, twingilako mwingilo wanji, kechi kumvwatu ne. Kabiji babena kwingila mwingilo wa kwa Lesa ke bantu ba batokwa.—Yako. 1:25.

¹⁶ Kimye kyo mubena kupwila pa kipwilo, taiko mana ne kulanguluka byo mu kengijisha byo mubena kumvwa. (Yoa. 13:17) Bambakanai mu mwingilo wa kwa Lesa ne kwingila na muchima yense. Lusekelo lwenu lukavula. Bwikalo bwenu bukawaminako kine kine kabiji bukekala na bwaluluzhi. Ee kine, mukamwenangamo.