Funjishainga Baana Benu Kutota Yehoba
1. Nanchi banyike bakonsha kutota Yehoba nyi?
1 Salamo 148:12, 13, watundaika bansongwalume ne bansongwakazhi ‘kutota jizhina ja Yehoba.’ Mu Binembelo mutanwa bya kumwenako byavula bingi bya banyike batotanga jizhina ja Yehoba. Kya kumwenako, “Samwela waingijilenga mwingilo ku menso a Yehoba saka akiji mwanyike.” (1 Sam. 2:18) “Kamwale” ye waambijile muka Nemani kuba’mba ngauzhi wa Yehoba mu Isalela ye wakonsheshe kubuka mbumba ya kwa Nemani. (2 Mfu. 5:1-3) Kimye Yesu kyo atwelele mu nzubo ya Lesa ne kuba mingilo ya kukumya, “banyike” bo babijikile’mba: “Hosana kwi mwana Davida!” (Mat. 21:15) Pano nga bansemi bakonsha kufunjisha byepi baana babo kutota Yehoba?
2. Mambo ka o kyanemena bansemi kwikala ba kumwenako bawama ku baana babo?
2 Kumwena ku Bansemi: Saka bakyangye kufunjisha baana babo bukine, banabalume bena Isalela bakambizhiwe patanshi abo bene kutemwa Yehoba kabiji ne kulama mikambizho yanji mu michima yabo. (Mpitu. 6:5-9) Umvwe saka mwambapo bintu byawama bya mu mwingilo kabiji ne kumwingilako mulungu ne mulungu, kikalengela baana benu kumumona kwikala wanema kabiji usangajika.
3. Nyenga umo wamwenejilemo byepi na mambo a kya kumwenako kya bansemi banji?
3 Nyenga umo uvuluka’mba: “Byo najinga mwanyike, mutanchi wetu wa kisemi wavwangilemo ne kwingilako mu mwingilo wa mu bujimi ku mpelo ya milungu. Namwene namba bansemi bami kine batemwa mwingilo wa kusapwila. Twakomenenga sa tumona uno mwingilo kwikala uleta bingi lusekelo.” Uno nyenga waishile kwikala musapwishi wabula kubatizwa saka aji na myaka ya kusemwa itanu na ibiji kabiji waingila kukila pa myaka 32 mu mwingilo wa kimye kyonse.
4. Kutwajijila na kufunjisha baana kilumbulula ka?
4 Kutwajijila na Kufunjisha Baana: Yainga na baana benu mu mwingilo wa mu bujimi. Apo kampe bakonsha kukonkonshako ku kinzhilo nangwa kupika odi, kupa mwina nzubo talakiti nangwa kutangakotu kinembelo. Kino kikebalengela kusangalala kabiji ne kwibakosesha kusapwila mambo a Bufumu. Byo babena kukoma bafwainwa kuyilangako palutwe mu kwingilako mu mwingilo. Onkao mambo, batundaikai kutwajijila kukomenangako kabiji ne kulangulukangapo pa bikonkwanyi bya ku mupashi.
5. Bi ka bikebewa pa kuba’mba mwana afikilemo kwikala musapwishi wabula kubatizwa?
5 Bulai bakulumpe mu kipwilo aku mumonatu’mba baana benu bafikilamo kwikala basapwishi babula kubatizwa kabiji umvwe bamwesha lusekelo lwa kukeba kwikala bino. Kwikala basapwishi kukebalengela kuyuka mutembo wabo wa kutota Yehoba. Vulukainga’mba mwana wa mucheche kechi ukebewatu’mba kana ayuke byavula nobe mukulumpe wabatizwa, bino pa afikilemo kwikala musapwishi ne. Abya mwanenu wayuka mafunjisho atanshi a mu Baibolo nyi? Nanchi ulondela mizhilo ya mu Baibolo ya byubilo byawama nyi? Abya ukeba kwingilako mu mwingilo ne kwiyukanyikisha’mba Kamonyi wa kwa Yehoba? Umvwe ibyo, bakulumpe mu kipwilo bakonsha kumumona’mba wafikilamo kwikala musapwishi wabula kubatizwa.—Monai buku wa Bakwatankana Kuba Kyaswa Muchima wa Yehoba, mape. 79-82.
6. Mambo ka o kyanemena bansemi kufunjishanga baana babo?
6 Kufunjisha baana kutota Yehoba kufuma panshi ya michima yabo kikebewa kwibikishako bingi. Nangwa byonkabyo, bansemi basangalala bingi pa kumona baana babo saka bakomenako ku mupashi. Kyanemesha, Yehoba utemwa bingi umvwe baana ke bambe pa mingilo yanji ya kukumya.