Funjishainga Baana Benu bya Kwingila mu Mwingilo
1. Kinembelo kya Salamo 148:12, 13 kyatundaika bansemi ba bwina Kilishitu kuba ka?
1 Yehoba ukeba bakyanyike kumutota. (Sala. 148:12, 13) Onkao mambo, bansemi ba bwina Kilishitu kechi bafunjishatu baana babo bukine bwa mu Baibolo ne mizhilo ya Lesa kwapwa ne. Bino bebafunjisha ne bya kwingila mu mwingilo wa kusapwila mambo awama. Bakonsha kutwajijila byepi kwibafunjisha?
2. Kwikala bansemi bakumwenako bawama kwakonsha kukwasha byepi baana?
2 Ikalai Bakumwenako Bawama: Mutonyi Gidiona waambijile banabalume banji 300 amba: “Mutalenga kwi amiwa ne kuba pamo byonka byo nsakuba.” (Mito. 7:17) Baana nabo balondela byuba bansemi babo. Nsemi wamulume umo wingila bufuku, umvwe wabwela lukelo pa Kibelushi, mu kifulo kya kuya na kulaala, uya na baana banji mu mwingilo nangwa kya kuba wakoka bingi. Kwakubula nangwa kwibambila ne, byo oba bibafunjisha kuba’mba mwingilo wanema bingi. (Mat. 6:33) Nanchi baana benu bemumona na kupopwela Lesa na lusekelo na biji kulomba, kutanga Baibolo, kukumbulapo pa kupwila ne kusapwila nyi? Kya kine kuba’mba kechi mwakonsha kwikala bakumwenako bawama mu byonse ne. Pano bino, baana benu bakafunda bya kupopwela Yehoba inge kebamone byo mwibikako kumwingijila.—Mpitu. 6:6, 7; Loma 2:21, 22.
3. Ñanyi bikonkwanyi bansemi byo bakonsha kutundaika baana babo kwibikila ne kufikizha?
3 Kwibikila Bikonkwanyi: Bansemi bafunjisha baana babo kwenda, kwamba, kuvwala ne bintutu bikwabo. Baana byo baya na kukoma batendeka kwibabikila bikonkwanyi byakatataka. Umvwe bansemi bena Kilishitu, batundaika baana babo kwibikila bikonkwanyi bya ku mupashi byaesakana na jifumbi jo bajipo. (1 Ko. 9:26) Nanchi mufunjisha baana benu kukumbulapo pa kupwila mu byambo byabo ne kunengezha majashi a mu Sukulu wa Mwingilo wa Lesa nyi? (Sala. 35:18) Abya mubena kwibafunjisha bya kwingila mbaji yapusana pusana mu mwingilo nyi? Nanchi mwibatundaika kubatizwa nangwa kwingilako mwingilo wa kimye kyonse nyi? Nanchi mwibatundaika kupwanañana na basapwishi babambakana bakonsha kwibatundaika nyi?—Mana. 13:20.
4. Baana bamwenamo ka umvwe bansemi batendeka kwibafunjisha bya kwingila mu mwingilo saka bakijitu banyike?
4 Nyimbi wa masalamo waambile’mba: “Anweba Lesa, mwamfunjishishenga ne ku bwanyike; Kabiji kufika ne lelo mbenakwamba mingilo yenu ya kukumya.” (Sala. 71:17) Funjishainga baana benu bya kwingila mu mwingilo saka bakijitu banyike. Kitendekesho kya ku mupashi kyo mwibakwasha kwala kikebakwasha bingi inge bakoma!—Mana. 22:6.