Bansemi—Funjishai Baana Benu Kufuma Kubwanyike
1 “Umvwe wafunjisha mwana kwenda mu jishinda jafwainwa, kechi ukafumamo byo akakoma ne.” (Mana. 22:6) Bansemi, umvwe kechi mukeba baana benu ‘kufumamo’ mujishinda jabukinene, kimyeka kyomwafwainwa kutatula kwibafunjisha? Kufuma kubwanyike!
2 Paulo byoaambile’mba Timoti wafunjilenga lufunjisho lwakumupashi ‘kufuma ku bwanyike,’ walumbulwilenga kimye kyabulukeke. (2 Timo. 3:14, 15) Kyafuminemo, Timoti waikele kemuntu wawama wakumupashi. (Fili. 2:19-22) Bansemi, nenuwa mwafwainwa kutatula kufunjisha baana benu ‘kufuma kubwanyike’ pakuba ‘bakomenenga ku meso a Yehoba.’—1 Sam. 2:21.
3 Batekezhai Mema Akwibakomesha: Byonka tubichi tucheche byotukeba kwitutekezha kikupu pakuba’mba tukome nekwikala kebichi bikatampe, nebaana babimino byapusana-pusana nabo bakebewa mema abukine bwamu Baibolo pakuba’mba bakome kwikala bakalume bakoma ba Lesa. Jishinda jikatampe jakufunjishishamo baana bukine nekwibakwasha kwikala balunda na Yehoba kekwikala nalufunjisho lwa Baibolo lwakisemi. Bino bansemi, bafwainwa kuyuka kimye baana babo bonse pamuntu pamuntu kyobatelekelamo. Kubaana babacheche, kyawama kwibafunjisha mutubimye twipi twapusana-pusana kukila kutaya kimye kikatampe nakubonkomatu.—Mpitu. 11:18, 19.
4 Kange mulanguluke’mba baana benu bakikepa kuba bafundane. Babulai mashimikila abantu bamu Baibolo. Babulai kulenga bipikichala byabintu byamu Baibolo nangwa kukaya bifwanyikizho byamu Baibolo. Batambishai mavidyo etu nekuteleka kumatepu, kuvwangapotu nebifwanyikizho byamu Baibolo. Mfunjishilo yalufunjisho lwakisemi yafwainwa kwesakana nabimino nebulume bwabaana benu. Lufunjisho lutanshi lwafwainwa kwikala lwapela, lwa byambotu bichebiche; bino mwana byoakoma, lufunjisho nalo kalukomeneko nabyambo byavula nekwilunungulula. Lengai mikambizho yamu Baibolo kwikala yakishinka kabiji yafwainwa. Byomukeba baana benu ‘kwikala na kilaka kya’ kufunda Mambo, lengai lufunjisho kwikala lwawama kwesakana napapelela bulume bwenu.—1 Pe. 2:2, NW.
5 Bavwangaimo Mukipwilo: Bikilai baana benu bikonkwanyi byakwikomesha pakuba’mba bevwangengamo mukipwilo. Kikonkwanyika kyakonsha kwikala kitanshi? Bansemi bajinga nabaana babacheche babiji baambile’mba: “Bonse babiji twibafunjishenga kubula kulokota mu Nzubo ya Bufumu.” Mukupita kwakimye, bakwashishe baana kukumbulangapo mubyambo byabo pakupwila nekwibabikila kikonkwanyi kyakunembesha mu Sukulu ya Mwingilo wa Teokalasi. Mumwingilo wamubujimi, kikonkwanyi kyobafwainwa kwibikila kekyakutambika talakiti kubantu pamazubo, kutanga kinembelo, kutambika magazini nekutatula mwisambo wawama nabantu bobatana pamazubo.
6 Ikalai Bakumwenako Bawama: Abya baana benu moba onse bemumvwa samwamba pe Yehoba nekulomba kwiayenyi? Nanchi bemumona samufunda Mambo anji, kutanwa kukupwila, kuya mumwingilo wamubujimi nekwikala nalusekelo mukuba kyaswa muchima wa Lesa nyi? (Sala. 40:8) Kyanema bingi kuba’mba bemumonenga nakuba byobyo kabiji nekubila nabo pamo bino bintu. Mwana wamukazhi umo wakoma waambile bino pebainanji bakomeshele baana babo batanu naumo kwikala ke Bakamonyi bakishinka’mba: “Kintu kyakijilemo kuwama kekyakuba’mba bamaama bajinga bakumwenako bawama—kitukebwile bingi michima kukila nebyambo.” Nsemi wabaana bana waambile’mba: “Kubika Yehoba palutwe’ kechi kyajingatu kyambone, byobyajinga bwikalo bwetu.”
7 Bansemi, tatulai kufunjisha baana benu saka bakikepa, kwibafunjisha bukine bwa Mambo a Lesa, kwibabikila bikonkwanyi nekwikala bakumwenako bawama. Mukamona lusekelo lukafumamo mukuba bino!