Kupopwela Yehoba mu Bukisemi
1 Mu kimye kya kala, ba mu kisemi baubilanga pamo bintu byavula. Baingijilanga pamo mingilo ya pa nzubo kabiji ne kyakijilemo kunema, bapopwelanga Yehoba mu bukisemi. (Levi 10:12-14; Mpitu. 31:12) Mu mapunzha avula lelo jino, ba mu bisemi kechi bobila pamo bintu byavula ne. Nangwa byonkabyo, bena Kilishitu abo bayuka buneme bwa kwingijila pamo mingilo mu bukisemi, kikatakata kutazha ku mpopwelo. Byo kisangajikapo muchima wa mwine Watendekeshe kisemi kumona bisemi saka bibena kumupopwela mu kukwatankena pamo!
2 Kusapwila Pamo: Kwingijila pamo mu kusapwila mambo awama kukosesha bingi kisemi. Onkao mambo, kununga pa kwingijila pamo na bakwabo ba mu kipwilo, mukulumpe mu kipwilo ukengilangako kimye kyonse ne na mukazhanji ne baana banji. (1 Timo. 3:4, 5) Nangwa baji na bya kuba byavula, bakulumpe benda nabo batanchikapo kimye kya kwingijila pamo mu mwingilo na bakazhi babo.
3 Baana baya na kusapwila pamo na bansemi babo, bakwashiwa bingi kukomenako mu kwikala basapwishi. Kino kechi kikebakwashatu kumona lusekelo lwa bansemi babo ne byawama bifuma mu mwingilo wabo ne, bino bakamona ne bansemi babo byo bakamweshanga butemwe bwabo bwa kutemwa Yehoba ne bwa bantu bakwabo. (Mpitu. 6:5-7) Buneme bwa kusapwila pamo na baana kechi bwafwainwa kukepana umvwe baana kebaye na kukoma ne. Bamulume ne mukazhi baji na baana basatu ba mu mafumbi a myaka 15 ne 21, batwajijila kwingijila pamo na bano baana babo kimye kyonse mu mwingilo. Shanja bano baana waambile’mba: “Kimye kyonse twibafunjishapo kintu kimo. Kabiji tumona kuba’mba kintu kyo twibafunjisha kyawama bingi, kabiji kitundaika.”
4 Kunengezhezha Pamo: Bisemi byatana kuba’mba, kikwasha bingi kunengezhezha pamo bya kwamba mu mwingilo. Baana javula bomvwa bingi bulongo kwivwangamo mu kupitulukamo kubiwa na ba mu kisemi pa kumwesha bya kwamba na bantu mu mwingilo nangwa kwikala mwina nzubo. Bisemi bimo byatemwa kuba bino mu maminiti achechetu panyuma ya lufunjisho lwa kisemi.
5 Lusekelo lwetu lubailako bingi umvwe ketwingijile pamo mingilo yanema kabiji isangajika na boba bo twatemwa. Byo kisangajikapo ba mu bisemi kwingijila pamo mu mwingilo wa ku nzubo ne nzubo, kubwelako kabiji ne kufunjisha mafunjisho a Baibolo! Onkao mambo, kimye kyo mupopwela pamo na kisemi kyenu, mwakonsha kwamba na lusekelo amba: “Amiwa ne ba mu nzubo yami, tukengijilanga Yehoba.”—Yosh. 24:15.