Kupwila kwa Kijiiji Kubena Kwiya

Yehoba wafwainwa kupewa lukumo. Tupana byepi lukumo kwi Yehoba? Ki ka kibena kulengela bantu bamo kukankalwa kupa Yehoba lukumo? Mapesho ka o bamwenamo boba babena kupa Lesa lukumo luno? Kupwila kwa kijiiji kwa mwaka wa mwingilo wa 2008 kukakumbula bingi bulongo ano mepuzho. Kishina kya kuno kupwila ke kya kuba’mba, “Byonse Kasa Mwibyubila Lukumo lwa Lesa.” (1 Ko. 10:31) Akimonai bintu bibena kwitupembelela pa moba abiji abena kwiya ayula na mikambizho yanema ya ku mupashi.

Mukulumpe wa nkambi ukamba pa mitwe yaamba’mba, “Mambo ka o Twafwainwa Kumupelanga Lesa Lukumo?” ne “Ikalai Bakumwenako mu Kuba Bikeba Lesa.” Ukamba jashi ja mvula bantu ja kuba’mba, “Bañanyi Bantu Bapa Lesa Lukumo?” kabiji ne jashi ja kapelampako ja kuba’mba, “Kukwatankena Pamo Mwaya Ntanda mu Kupa Lesa Lukumo.” Kabiji ukatangijila ne Sukulu ya Mwingilo wa Teokalasi. Mukulumpe wa kijiiji ukamba pa bishina bya kuba’mba, “Sekelainga mu Kumwesha Lukumo lwa Lesa,” “Kwambapo pa Bibena Kukebewa mu Kijiiji,” ne “Twajijilai ‘Kwikajisha mu Bukine,’” kufuma mu 2 Petelo 1:12. Kunungapo, tukafunda pa mambo a “Mwingilo wa Bupainiya Uleta Lukumo kwi Lesa.” Jashi ja kushilañana jikekala na mutwe wa kuba’mba, “Kupa Lesa Lukumo mu Mbaji Yonse ya Bwikalo Bwetu,” kabiji mbaji itanshi ibiji itundaikañana ya jino jashi, ikalumbulula bulongo mwatala byambo byanembeshiwa na mupashi biji mu 1 Kolinda 10:31. Jashi ja kushilañana jiji na mutwe wa kuba’mba, “Kwingila Mwingilo Wazhila wa Kutota Yehoba,” jikamba pa mbaji yapusana pusana ya mpopwelo yetu. Tukekala na ngipipishilo ya Kyamba kya Usopa ne kubalaulabalaula kinembelo kya juba pa Mulungu. Kabiji kukekala ne lubatizhilo.

Bantu bavula kechi bakeba kumuyuka Lesa ne. Bavula balabikwa bingi na bya kubauba bya bantu bibalengela kubula kulangulukapo pe Yehoba. (Yoa. 5:44) Bino, atweba twayuka bingi bulongo buneme bwa kwikala na kimye kya kumona byo twakonsha kubila ‘Bintu Byonse Lukumo lwa Lesa.’ Nengezhai kuba’mba mukatanweko ne kumwenamo pakatampe mu bipungu byonse bina.