Juba ja Kupwila Kwiikajila Kubena Kwiya

Kishina kya Juba ja kupwila kwiikajila kwa mwaka wa mwingilo wa 2008 ke kya kuba’mba, “Atweba twi Buchimba—Yehoba Ye Mbumbi Wetu,” kufuma mu Isaya 64:8. Lujimuno lwa mu Binembelo luji mu uno mutanchi, luketulengela kuteshako muchima wa kuyukisha maana a Yehoba, bololoke, bulume ne butemwe bwanji byo aji Mbumbi Mukatampe.

Jashi ja mukulumpe wa kijiiji jiji na mutwe wa kuba’mba, “Kwingila Pamo Nobe Bijiilo bya Buneme mu Mwingilo,” jikamwesha bantu bavula byo babena kumwenamo mashuko akatampe a kuyuka bukine kabiji ne kwibuyukanyikisha ku bakwabo. Jashi ja kuba’mba, “Kulanguluka langulukapo pa Bintu Kukemuzhikijila,” jikalumbulula bulongo kulanguluka langulukapo pa mafunde aoloka a Yehoba byo etuzhikijila. Ñambi mwenyi ukamba jashi ku luonde pa bishina bya kuba’mba, “Kange ‘Mwipashañanyenga na ba Panopantanda Ne’” ne “Bumbiwainga kwi Mbumbi Mukatampe.” Bansemi ne baana bakatundaikwa mu majashi a kuba’mba “Bakyanyike Bengijishiwa kwi Yehoba” ne “Mwingilo Wanema wa Bansemi wa Kubumba Baana.” Kupichila mu bimwesho ne mu misambo ya mepuzho, tukatemwa bingi kumvwa ne kumona bintu balongo ne banyenga yetu byo babena kuba mu mwingilo. Aba babena kukeba kumwesha kwipana kwabo kwi Lesa kupichila mu lubatizhilo lwa mu mema, bafwainwa kubula bukiji bukiji mukulumpe utangijila. Mukasendele jimo Kyamba kya Usopa kya kufundamo yewo mulungu ukekelamo juba ja kupwila kwiikajila.

Bintu byonse Mbumbi Mukatampe byo akeba kuba, wibyuba. Kiji kwi atwe bene kusalapo umvwe tukeba’mba tubumbiwe kwi Yehoba. Aba baswa kubumbiwa kwi Yehoba ne kwibawamisha, byonka bibumbiwa buchimba mu kuboko kwa mbumbi, bakonsha kubumbiwa kabiji ne kwibawamisha kwikala bijiilo byawama kwingijisha. Kunekenena Yehoba mu jino jishinda kwitukwasha kabiji kutumbijika bumfumu bwanji ne kutambula bibusa byavula.