Juba ja Kupwila Kwiikajila Kubena Kwiya

Kishina kya juba ja kupwila kwiikajila kwa mwaka wa mwingilo wa 2009 ke kya kuba’mba, “Teshai Muchima ku Mwingilo . . . , ne Kumupwisha” kufuma mu Kolose 4:17. Byo tuji bena Kilishitu, twatundaikwa bingi kuba bino. Nkebelo yetu ke ya kwingila mwingilo wetu bulongo mu bukishinka byonka byaubile Yesu. (Yoa. 17:4) Mutumwa Paulo wajinga wa kumwenako wawama bingi mu uno mwingilo. Wakebeshe bingi kupwisha kikonkwanyi kyanji mu mwingilo.—Byubilo 20:24.

Jashi ja mukulumpe wa kijiiji jikamwesha basapwishi bavula byo babena kushinda makatazho mu mwingilo wabo. Jashi ja kuba’mba, “Komeshainga byo Mwabyajile,” jikalumbulula bulongo byo twakonsha kukwasha kya kine boba ‘batongwelwa jimo baji na muchima wa bukishinka wa kukeba bumi bwa myaka.’ (Byubilo 13:48, NW) Ñambi mwenyi patanshi ukamba pa 2 Kolinda 6:1-10, kyepelo pa kyepelo mu jashi ja kuba’mba, “Byo Twilumbulula Atwe Bene byo Tuji ba Mingilo.” Mute ukamba jashi ku luonde pa kishina kya kuba’mba, “Nemekeshainga Mwingilo Wenu.” Mukatundaikwa bingi na majashi a kuba’mba, “Anweba Bakyanyike ne Bakulumpe Tanainga Lusekelo mu Mwingilo.” ne “Bakyanyike Bapwisha Kwingila Mwingilo.” Aba babena kukeba kumwesha kwipana kwabo kwi Lesa kupichila mu lubatizhilo lwa mu mema, pa kupwila kwa kijiiji nangwa pa juba ja kupwila kwiikajila, bafwainwa kubula bukiji bukiji mukulumpe utangijila. Lubaji lwanema lwa kupwila kukatampe konse ko twikala nako, ke kufunda kwa Kyamba kya Usopa. Mukasendele jimo Kyamba kya Usopa kya kufundamo yewo mulungu ukekelamo juba ja kupwila kwiikajila.

Byo twingila mwingilo wetu bulongo, twibikako kumona’mba bintu bikwabo byo tusaka ne kuba kechi bibena kwitutaila kimye kya kubilamo mingilo Yehoba yo etupa ne. Lutundaiko lwa mu Binembelo lo tukatambula pa jino juba ja kupwila kwiikajila, lwafwainwa kwitukwasha atweba bonse kuyuka kyo twafwainwa kuba pa kuba’mba twikale na milanguluko yawama ne kupitulukamo mu byo tubena kuba mu mwingilo kuba’mba tumwingile bulongo.