Kwikosesha Atwe Bene na Bene
1. Ñanyi jishuko jo twikala najo pa kufwakasha kwa bakulumpe benda?
1 Mutumwa Paulo wanembejile kipwilo kya mu Loma amba: “Nasakishatu kwimumona, namba nemupe kya bupe kya bumupashi; mukose ne ku kosa; ko kuba’mba, twikwashe atwe bene na bene, bonse na lwitabilo lwa mukwabo, ne lwa kwami ne lwa kwenu pamo.” (Lo. 1:11, 12) Kufwakasha kwa bakulumpe benda mu ano moba etu nako kwitulengela kwikala na jishuko ja kwikosesha atwe bene na bene.
2. Mambo ka kufwakasha kwa mukulumpe wa kijiiji o kubijikilwa jimo?
2 Kipwilo: Kufwakasha kwa mukulumpe wa kijiiji javula kubijikilwa jimo ku kipwilo kasa kwakishala ba ñondo basatu. Kino kitupa kimye kya kwinengezhezhamo kuba’mba tukamwenemo. (Efi. 5:15, 16) Umvwe mwingila nkito ya ku mubiji, mwakonsha kulombako kimye ku nkito kuba’mba mukayeko mu mwingilo wa mu bujimi mu yewo mulungu. Bamo banengezha kwingilako bupainiya bwa kukwasha mu ñondo ukafwakeshamo mukulumpe wa kijiiji. Umvwe mwanengezha kukafumapo, abya mwakonsha kukilajikako lwendo lwenu kuba’mba mukatanweko mu yewo mulungu nyi?
3. Ki ka kyo twakonsha kuba pa muntu pa muntu kuba’mba tukakoseshiwe pa kufwakasha kwa mukulumpe wa kijiiji?
3 Nkebelo ine ya kufwakasha kwa mukulumpe wa kijiiji ke ya kukosesha basapwishi pa muntu pa muntu ne kwibafunjisha bya kwingila mwingilo wa mu bujimi. Nanchi mwakonsha kunembesha kukengilako nanji nangwa na mukazhanji umvwe wasongola nyi? Mukulumpe wa kijiiji usekela bingi kwingila na basapwishi bapusana pusana, kuvwangakotu ne boba bakeba kwikala basendwe mu uno mwingilo. Bonse bakonsha kufunjilako ku byo abena kwingila mu mwingilo, ne kwingijisha mashinda o akonsha kwibapa. (1 Ko. 4:16, 17) Kumwita ku nzubo yenu na kuja nanji kajo, kukemupa jishuko jikwabo ja kwisambila pamo misambo ya kwikosesha. (Hebe. 13:2) Byo kiji kuba’mba majashi anji amba pa bibena kukebewa pa kipwilo, kasa mutelekesha.
4. Twakonsha kumukosesha byepi mukulumpe wetu wa kijiiji?
4 Mukulumpe wa Kijiiji: Mutumwa Paulo kechi wapusene na balongo bo aingijilanga ne, mambo naye wapitanga mu makatazho ne kwikala na bijikila kabiji wakebanga kumukosesha. (2 Ko. 11:26-28) Kipwilo kya mu Loma byo kyaumvwine’mba Paulo, aye kaili waishilenga ko baji, bamo baendele makilomita 74 na kumutundaila kufika ne ku kisankanyi kya Apiusa! “Kabiji Paulo, byo ebamwene, wamutotele Lesa, ne muchima wakosa ne kukosa.” (Byubilo 28:15) Ne anweba mwakonsha kumukosesha mukulumpe wenu wa kijiiji. Mumweshai “mushingi wakila” kupichila mu kwingijila nanji pamo. (1 Timo. 5:17) Mweshai lusanchilo lwenu lwa kine pa byo emubila. Aye ne mukazhanji bakasekela bingi pa kumona lwitabilo lwenu, butemwe bwenu ne kuchinchika kwenu.—2 Tesa1:3, 4.
5. Mambo ka ano moba atweba bonse o tukebela kukoseshiwa?
5 Mu bino “bimye byakatazha,” i ñanyi mwi atweba ubula kukeba kukoseshiwa? (2 Timo. 3:1) Nengezhezhai jimo lonka luno kuba’mba mukengileko mwingilo na mukulumpe wa kijiiji mu mulungu wiikajila. Bakulumpe benda ne basapwishi mu kipwilo—bonse bakonsha kwikosesha bene na bene. Mu jino jishinda tukatwajijila na ‘kwikosesha ne kwikomesha atwe bene na bene.’—1 Tesa. 5:11.