“Paulo Wasanchijile Lesa ne Kukosa Wakosele”

Ba mu kipwilo kya mu Loma byo baumvwine amba Paulo ubena kwiya, balongo bavula bayile na kumutundaila kabiji baendele museke walepele nobe makilomita 64. Butemwe bo bamumwesheshe bwalengejile Paulo kubapo ka? “Paulo byo ebamwene, wamusanchijile Lesa ne kukosa wakosele.” (By 28:15) Nangwa kya kuba Paulo wayukanyikilwe’mba watundaikanga bipwilo byo afwakeshanga, bino pa kikye kimye byo ajinga kaili, aye yeye batundaikile.—2Ko 13:10.

Ne lelo jino, bakalama ba mwanzo bafwakesha bipwilo pa kuba’mba batundaike balongo ne banyenga. Byonkatu byo tuji ne atweba, bakalama ba mwanzo nabo bakooka, bekala na bijikila ne kulefulwa. Onkao mambo, kimye kikwabo kikemufwakesha kalama wa mwanzo ne bakazhi banji pa kwingijila kipwilo kyenu, mukoba byepi pa kuba’mba mwibatundaike ne ‘kwikosesha anwe bene na bene’?—Lo 1:11, 12.

• 

  Tanwaingako ku kusambakana kwa kuya mu mwingilo. Kalama wa mwanzo utundaikwa bingi inge basapwishi bepana kutundaika mulungu wiikajila pa kuba’mba bamwenemo. (1Te 1:2, 3; 2:20) Inge ye ñondo ye abena kufwakesha kipwilo kyenu, mwakonsha kwingilako bupainiya bwa kukwasha. Nanchi mwakonsha kunembesha kwingila nabo mu mwingilo nangwa kuya nabo ku bantu bo mufunjisha Baibolo nyi? Bomvwa bingi bulongo kwingila na basapwishi bapusana pusana, kubikapotu ne bakatataka nangwa babula kuyukisha busendwe bwa kusapwila.

• 

  Batambwilainga. Nanchi mwakonsha kwibatambwila ku nzubo kwenu nangwa kwibeta ku kajo nyi? Kuba bino kumwesha’mba mwibatemwa bingi. Kechi mwakonshatu kwibatambwila inge muji na bintu byavula ne.—Luk 10:38-42.

• 

  Umvwinainga ne kulondela byo bemubuula. Bakalama ba mwanzo betukwasha bingi kuwamishako busendwe bwetu mu mwingilo wa Yehoba. Kimye kimo, bakonsha kwitololako mu bintu bimo mo tubena kubula kuba bulongo. (1Ko 5:1-5) Kumvwina ne kukookela byo betubula kwibaletela bingi lusekelo.—Heb 13:17.

• 

  Basanchilainga. Bulainga bakalama ba mwanzo ne benakwabo byo mumwenamo mu kufwakasha kwabo. Mwakonsha kwibasanchila pa kwisamba nabo nangwa kwibanembela nkalata.—Kol 3:15.