Tekeneshainga Bantu Baji na Bulanda
1. Mambo ka bantu baji na bulanda o bafwainwa kutekeneshiwa?
1 Kufwisha mulongo kuleta bingi binyenge bikatampe, kikatakata ku boba babula luketekelo lwa Bufumu. (1 Tesa. 4:13) Bavula bepuzha’mba: ‘Nanchi mambo ka bantu o bafwila? Nanchi baya pi? Abya mukwetu nkamumonapo jibiji nyi?’ Panshi po paji mashinda a kutekenesheshamo boba botutana mu mwingilo wa mu bujimi babena kujila na mambo a kufwisha mulongo wabo nangwa mulunda nabo.—Isa. 61:2.
2. Umvwe mwina nzubo witubula’mba uji bingi na bulanda, nanchi twafwainwa kulepesha mwisambo nyi?
2 Ku Nzubo ne Nzubo: Mwina nzubo wakonsha kwitubula’mba katatakatu po afwisha wa mu kisemi kyanji. Nanchi ubena kumwekanyika’mba uji na bulanda bukatampe nyi? Nanchi mu nzubo mwapwila bakilongo bekunjika kunjikatu nyi? Mu bimye bya uno mutundu, kyakonsha kuwama kwipipishako mwisambo. (Sapwi. 3:1, 7) Kampe twakonsha kumwambila byambo bya kumwesha’mba twamumvwina lusa, kumupa talakiti, magazini nangwa buloshuwa waamba pa lufu, kepo ne kumushajikapo. Apa bino pa kimye kikwabo kyafwainwa twabwelako na kukesamba nanji byambo bikwabo bya lutekenesho kufuma mu Baibolo.
3. Umvwe kyakonsheka, Binembelo ka byo twakonsha kumutangila mwina nzubo uji na bulanda?
3 Kimye kimo, kwesakanatu na motwamutaina muntu, twakonsha kulepeshako mwisambo pa kyonkakyo kimye kitanshi kyo twamufwakesha. Nangwa kya kuba kimye kya uno mutundu kechi kyo kya kukainamo bintu byo aitabilamo ne, twakonsha kutangila nanji pamo milaye ya mu Baibolo yaamba pa mambo a lusanguko. (Yoa. 5:28, 29) Nangwa twakonsha kwisamba nanji Baibolo byo aamba pa mambo a bafu. (Sapwi. 9:5, 10) Kabiji jishimikila ja mu Baibolo jaamba pa lusanguko jakonsha kumutekenesha bingi. (Yoa. 11:39-44) Jishinda jikwabo, ke kwisamba nanji pa byambo bya luketekelo mwi Yehoba byaambilepo Yoba muntu wa kishinka. (Yoba 14:14, 15) Ku mpelo ya mwisambo twakonsha kumushila buloshuwa, wa Cinshi Cicitika Nga Twafwa?, Ilyo Untu Watemwa Afwa, nangwa buloshuwa mukwabo nangwa talakiti wamufwainwa. Nangwa twakonsha kumushila buku wa Baibolo Ufunjisha, ne kumubula’mba akatange byambo biji mu kitango 6, apa bino twamulaya kukeya na kwisamba nanji bulongo pa uno mutwe.
4. Ñanyi bimye bikwabo byo twakonsha kutekenesheshamo bantu?
4 Pa Bimye Bikwabo: Umvwe jashi ja kijilo jisakwikela mu Nzubo ya Bufumu, nanchi bantu babula Bakamonyi basa kutanwako nyi? Twakonsha kwibapa mabuku muji byambo bya lutekenesho. Bamo basanta bingi umvwe batambwila mabuku a kupa ba mu kisemi kyabo baiya pa kijilo. Kimye kimo mawi a kijilo ekala mu mapepala a byambo, alengela bamo kunembela kyokyo kisemi kyafwisha mulongo wabo byambo bya lutekenesho. Ku mpunzha imo, panyuma ya kutambwila nkalata mwajinga ne matalakiti, mwanamulume umo wafwishishe mwina kwanji wayile na mwananji wa mukazhi ku nzubo ya musapwishi na kwipuzha’mba: “Yenu mwantumijile ino nkalata nyi? Mbena kukeba kuyuka byavula pa mambo a Baibolo!” Uno mwanamulume ne mwananji baswile lufunjisho lwa Baibolo kabiji ne kutendeka kutanwa ku kupwila kwa kipwilo.
5. Mambo ka o twafwainwa kumonangapo bimye bya kutekenesheshamo boba babena kujila?
5 Musapwishi 7:2 waamba’mba: ‘Kuya ku nzubo ya majilo kyawama kukila kuya ku nzubo ya kijiilo.’ Muntu uji na bulanda wakonsha kuteleka bingi ku mambo a Lesa kukila muntu wasangalala. Atweba bonse twafwainwa kumonangapo bimye bya kutekenesheshamo boba baji na bulanda na mambo a kufwisha mulongo wabo.