Basapwishi ba Bufumu Batemwe:

Twimwena bipangwa byawama byafuma mu mingilo yawama yaingijiwe mu mwaka wa Mwingilo wapwa! (Isa. 3:10) Mu March bibelengelo mu mbaji ya mwingilo ibiji byayijileko peulu: Mabuku kukila pa 47,000 ashajikilwe, kabiji mafunjisho a Baibolo pepi na 250,000 atangijilwe. Ee kine, buku wa Baibolo Ufunjisha ubena kukwasha bingi basapwishi bamafumbi apusanapusana, byonka byo kyamweshiwa na kino kyamwekele:

Lweendo wajinga na jishuko ja kukwasha mufunjishi wanji ne bakwabo baana basukulu kumvwisha Baibolo kine byo afunjisha. Mukwabo mo bafunjila byo ashikishe mufunjishi pa mambo a musalabu, mufunjishi waambijile Lweendo kukumbula buno bwipuzho. Lweendo waambile’mba, “Na mambo a kuba nsenda kimye kyonse Baibolo ne buku wa Baibolo Ufunjisha ku sukulu, natolele buku mu kyola kyami ne kuzhikula pa mutwe uji mu bya kulumbulula waamba’mba Ene Mambo Bena Kilishitu Bakine o Babujila Kwingijishila Musalabu mu Mpopwelo. Twatangile mafuka ne binembelo. Mufunjishi wami waumvwine bingi bulongo kabiji natendekele ne lufunjisho lwa Baibolo nanji kabiji ne na bakwetu babiji motufunjila.”

Kibelengelo byo kibena kuyilako palutwe, kuji kwingila bingi na ngovu kwa kuwamisha Mazubo a Bufumu ne bishimikwa byawama bya kupwilamo kupwila kukatampe. Mu Chingola, Kabwe ne Mufulira batendeka ne kala kumwenamo mu bishimikwa bya kupwilamo kukatampe. Kimye kyabaya, bulume ne mali bibena kwingijishiwa bingi pa kuba’mba bishimikwa byasalululwa bya kupwilamo mu mapunzha a mu mizhi biwamishiwe. Byo ketutwele mu mwaka wa mwingilo mupya, tubena kulomba mupashi wa Lesa kutwajijila kwitukwasha kwikala na muchima wa kutundaika mwingilo wa kusapwila Bufumu mu jishinda jiji jonse.—Mat. 6:33; 10:41.

Atweba balongo benu,

Ofweshi wa Musampi wa mu Zambia