Funjishainga Bantu Kutemwa Yehoba
1. Bintu ka bilengela bantu bamo kufwenya kwipi ne Yehoba?
1 Nanchi muvuluka kimye kitanshitu kyo mwafunjile pe Yehoba nyi? Ki ka kimulengejile kufwenya kwipi ne aye? Umvwe mwashikisha bantu bavula bamichima ya kishinka, bakemubula’mba bafwenyenye kwipi ne Mulenga kimye kyo bafunjile pa byubilo byanji bikatampe, kikatakata lusa ne butemwe bwanji.—1 Yoa. 4:8.
2, 3. Twakonsha kwingijisha byepi buku wa Baibolo Ufunjisha kukwashishamo bo tufunjisha Baibolo kukomesha butemwe bwabo pe Yehoba?
2 “Uno ye Lesa Wetu”: Buku wa Baibolo Ufunjisha waamba bingi pa butemwe bwa Yehoba ne pa ene mambo o kyanemena kwikala na bulunda ne aye pa muntu pa muntu. Twakonsha kwingijisha byepi uno buku kufunjishishamo bantu kukomesha butemwe bwabo pe Lesa? Umvwe ke twambe pa kishinka kimo, twakonsha kwipuzha ye tubena kufunjisha mepuzho a kumulengela kwamba biji ku muchima wanji, nabiji a kuba’mba: “Nga buno bukine bubena kumwesha ka pe Yehoba?” nangwa kuba’mba “Nga kino kishinka kibena kumwesha byepi kuba’mba Yehoba ye Shetu wakijishamo kuwama?” Kulondela jino jishinda pa kufunjisha kwakonsha kukwasha ye tubena kufunjisha kutendeka kwikala na bulunda bwakosa ne Yehoba.
3 Umvwe ketukwashe bo tufunjisha Baibolo kuyuka buneme bwa kufunda maana a Lesa wa kine ujiko, bakeya kuyuka byonka byaambile Isaya’mba, “uno ye Lesa wetu.” (Isa. 25:9) Pa kulondolola Mambo a Lesa, twafwainwa kulumbulwisha bulongo bantu byo bakamwenamo byawama mu kufikizhiwa kwa nkebelo ya Yehoba kupichila mu kafulumende wanji uji mu maboko a Kilishitu Yesu.—Isa. 9:6, 7.
4, 5. Kutemwa Yehoba kwatala mu ka?
4 Bintu Bimwesha’mba Twatemwa Yehoba: Twayukishatu kuba’mba kutemwa Yehoba na muchima wetu yense, mweo, ne maana etu onse kechi kulumbulula kwiumvwatu amba twamutemwa Lesa ne. Twafwainwa kutwajijila kwikala na ndangulukilo yanji. (Sala. 97:10) Kutemwa Lesa kumwekela mu kwikala na mukoyo wa kulondela mikambizho yanji ne kutwajijila mu “bwikalo bwazhila ne bwa kunemeka Lesa,” kikale mu kimye kya meseko nangwa kwitukanya.—2 Pe. 3:11; 2 Yoa. 6.
5 Kuba kyaswa muchima wa Lesa saka twamutemwa ke kintu kileta bingi lusekelo. (Sala. 40:8) Ye tufunjisha Baibolo wafwainwa kuyuka amba mikambizho ya Lesa yonse yabikwako kuba’mba bakalume banji bamwenengamo byawama myaka ne myaka. (Mpitu. 10:12, 13) Mu kulondela lutangijilo lwanji, muntu mo mo akonsha kumweshesha lusanchilo lukatampe pa mingilo ya Lesa yonse yakukumya. Kwashai ye mufunjisha kuyuka’mba kwenda mu mashinda aoloka a Yehoba kwakonsha kulengela muntu kukepeshako bijikila.
6. Kutemwa Yehoba kwakonsha kulengela muntu kumwenamo ñanyi bibusa?
6 Lesa Ubila Bibusa Aba Bamutemwa: Yehoba wata bingi muchima bantu bekepesha ne kumutemwa, kabiji wibasolwela ne bintu “byazhika bya Lesa.” (1 Ko. 2:9, 10) Kupichila mu kuyuka nkebelo ya Yehoba, abano baji na mweno yawama ya bintu bya kulutwe ne luketekelo lwa kine. (Yele. 29:11) Aba batemwa Yehoba bamwenamo bingi mu lusa lwanji lukatampe. (Lupu. 20:6) Banemeka luketekelo lwa bumi bwa myaka, mambo Lesa wibamwesha butemwa bwanji bukatampe.—Yoa. 3:16.
7. Mwiumvwa byepi umvwe ke mufunjishe bantu kutemwe Yehoba?
7 Umvwe ke tuyukilepo byavula pe Shetu wa mwiulu, po po twikesha na muchima wa kubulako bakwetu byo tufunda. (Mat. 13:52) Byo jaikalapo jishuko janema ja kufunjisha bantu kutemwa Yehoba, kikatakata baana betu! (Mpitu. 6:5-7) Mwane twayai atweba bonse pamo ne bo tufunjisha Baibolo tutwajijile kwamba pa mambo a nkuwa ya ‘kuvula kwa kuwama kwa Yehoba.’—Sala. 145:7.