Tuji na bya Buneme byo Twafwainwa Kubulako Bantu
1 Mu Mambo a Lesa muji bya buneme bya ku mupashi byavula bingi byo twanemeka. (Sala. 12:6; 119:11, 14) Pa kimye kimo, Yesu waelele bishimpi byalumbulwilenga mbaji yapusanapusana ya Bufumu, kepo aipwizhe baana banji ba bwanga’mba: “Mwibikobakanya abyo byonsenyi?” Byo bakumbwile amba ee bebikobakanya, wibambijile’mba: ‘Byonkabyo banembeshi bonse bo baalula ke baana ba bwanga mu bufumu bwa mwiulu bapashañana nobe mwina nzubo, usolola bya mu nsabo yanji, bipya ne bya kala.’—Mat. 13:1-52.
2 Bukine bwa mu Baibolo bo twatendekejilepo kufunda, twakonsha kwibumona nobe bya buneme bya kala. Kupichila mu kutwajijila kwikala na lufunjisho lwa pa bunke lwa bintu byazhika bya mu Mambo a Lesa, tutainapo bukine bukwabo bwa mu Baibolo bwiya kwikala ke bya buneme bipya kwi atweba. (1 Ko. 2:7) Kabiji kupichila mwi ‘kalume wa kishinka ne wa maana,’ twiya kuyukilapo ne bya buneme bipya.—Mat. 24:45.
3 Twanemeka bingi bino bya buneme, kikale bya kala nangwa bipya. Kino kitulengela kukeba kufunjishiwa ne kwikala bafunjishi bayuka kufunjisha bulongo Mambo a Lesa, kabiji ne kubulako bantu bukine bukwabo bwanema bo twafunda.
4 Funjilai ku Byaubilenga Yesu: Pa kuba’mba amweshe byo eumvwinenga pa mambo a bino bya buneme, Yesu waingijilenga kyabaya bingi kubulako bantu pa mambo a bino bintu. Nangwatu pa bimye byo eumvwinenga kukoka, kechi walekele kuleya bya buneme mu “butala” bwanji ne.—Yoa. 4:6-14.
5 Yesu byo atemenwe boba babujile kuyukisha bulongo Lesa ne nkebelo yanji, kyamulengejile kwibabulako bya buneme bya bukine bwa Lesa bipana bumi. (Sala. 72:13) Waubilanga lusa boba bajinga na nzala ya ku mupashi kabiji kino kyamulengejile “kwibafunjisha byavula.”—Mako 6:34.
6 Londelainga Yesu: Umvwe ketunemekeshe bya buneme byo tuji nabyo, tukakebeshanga bingi kwibamwesha bantu bintu bya buneme bya ku mupashi biji mu Baibolo, byonka byaubanga Yesu. (Mana. 2:1-5) Nangwa kya kuba pa bimye bimo twakonsha kukoka, tukambanga na kizaku bukine bwa mu Binembelo. (Mako 6:34) Lusanchilo lwetu lukatampe lwa bintu bya buneme luketulengelanga kwingila pakatampe na ngovu mu mwingilo.