Kabokoshi Ka Mepuzho

◼ Inge kya kuba bantu babena kwisongola bakeba kwingijisha Nzubo ya Bufumu, ñanyi bintu byo bafwainwa kwisambapo na bakulumpe mu kipwilo?

Masongola anengezhiwa mwayila mafunde a mu Baibolo aleta bingi munema kwi Yehoba. Kino byo byo kiji kikatakata ku masongola ekela pa Nzubo ya Bufumu, mambo bintu byubiwa pa ano mazubo byo bimwesha jibumba jetu byo jiji. Onkao mambo, pa kuba’mba “bintu byonse byubiwe na mushingi ne mo byalondakena,” kyawama bakulumpe mu kipwilo kwisamba na bano bantu bintu bimo byalamata ku masongola abo umvwe bakeba’mba akobiwe mu Nzubo ya Bufumu.—1 Ko. 14:40.

Bantu babena kwisongola bakeba kwingijisha Nzubo ya Bufumu bafwainwa kunemba nkalata ne kwiipana ku kometi ya mwingilo ya mu kyokyo kipwilo kyo bajimo. Ino nkalata yabo bafwainwa kwiipana bukiji, ne kumwesha juba ne kimye kyo bakeba kukengijisha yoyo Nzubo ya Bufumu. Bafwainwa kuyuka’mba bakulumpe mu kipwilo kechi bakalula mutanchi wa kupwila kuba’mba bapingizhepo masongola abo ne. Kabiji bamusongwa ne musongoshi bafwainwa kwikala na byubilo byawama, balondela mafunde a mu Baibolo kabiji ne mizhilo ya Yehoba yaoloka.

Pa kuba’mba masongola abo amweshe munema pe Lesa, bano bantu bafwainwa kwisamba na kometi ya mwingilo lunengezho lwa masongola abo saka kukiji kimye. Nangwa kya kuba bakulumpe mu kipwilo kechi baji na lūsa lwa kwibakanya bintu byo bakeba kuba ne, umvwe kuji bintu bimo byabula kufwainwa byo babena kunengezha, bafwainwa kumvwina byaamba bakulumpe. Nyimbo yafwainwa kwimbiwa ke yonkayatu yafuma mu Kingdom Melodies nangwa iji mu buku wetu wa nyimbo. Kabiji inge bakeba kukabika bintu bya kuwamisha Nzubo ya Bufumu nangwa kubika mipando mo bakakebela pa jojo juba, bafwainwa kutambula lūsa ku bakulumpe mu kipwilo. Umvwe kukekala bakebakopanga bipikichala nangwa bakebakopanga vidyo, bino bintu kechi byafwainwa kulengela masongola kubula kumwesha munema ne. Bakulumpe mu kipwilo bakonsha kwiiswisha Nzubo ya Bufumu kwiingijisha pa kupitulukilamo jimo mu kikobiwa pa jojo juba, kikulutu kechi kyaubiwa pa kimye kya kupwila ne. Bikachi bya kwichilapo bantu kechi byafwainwa kubikiwa pa kipabi kya mabulañano ne. Pano bino, bakulumpe mu kipwilo bakonsha kubijika ku kipwilo pa Kupwila kwa Mwingilo kimye kikekelamo oo masongola pa Nzubo ya Bufumu.

Nangwa kya kuba kechi kikebewa’mba batubaala bonse bafwainwa kwikala babatizwa ne, kechi kyakonsha kuwama kwingijisha bantu baji na byubilo byatama byapusana na mafunde a mu Baibolo nangwa baji na byubilo byakonsha kutuntwisha boba batanwako ne. Mukulumpe mu kipwilo waitabizhiwa na kafulumende kusongwesha umvwe po aji, ye wafwainwa kusongwesha bobo bantu. Bakulumpe mu kipwilo bafikilamo kufunjisha Mambo a Lesa, onkao mambo bo bafwainwa kulumbulula bulongo bishinka byaamba pa mafunde a mu Binembelo alamata ku masongola.—1 Timo. 3:2.

Byo kiji kuba’mba awo masongola amulamata mukulumpe mu kipwilo ukasongweshanga, kyawama kumubujila jimo lunengezho lwa masongola saka ku kiji kimye. Uno mukulumpe ukamonañana na bano bantu ne kwibepuzha pa mambo a byubilo byabo byo byajinga kufuma kimye kyo beipangwizhe; kabiji nabo bafwainwa kwamba kine kechi kufya ne. Inge kya kuba’mba mwanamukazhi wasongwelwepo kala nangwa mwanamulume wasongwelepo kala, bonse babiji bafwainwa kumwesha kuba’mba Binembelo ne mizhilo ibaswisha kusongola jibiji. (Mat. 19:9) Kino kyavwangako ne kumumwesha yewo mukulumpe kitupa kya kuba’mba masongola akala a yewo muntu kine apwile.

Umvwe bantu bakeba kwisongola baamba bintu bya kine ne kumvwina bibabulako bakulumpe mu kipwilo, masongola abo akekala a lusekelo ku bantu bonse.—Mana. 15:22; Hebe. 13:17.