Mwakonsha Kukumbula’mba Ka?
1. Umvwe muntu witwipuzha, mambo ka o twafwainwa kukumbula bya kumbulanga Yesu?
1 Ne lelo jino, bantu bakumya bingi inge bavuluka Yesu byo a kumbulanga mepuzho o bamwipuzhanga. Umvwe bantu betwipuzha mu mwingilo wetu, ne atweba twafwainwa kukumbula byonka bya kumbulanga Yesu.—1 Pe. 2:21.
2. Ki ka kyakonsha kwitukwasha kuyuka bya kukumbula bwipuzho bo betwipuzha?
2 Patanshi Umvwai: Kasa akyangye kukumbula, Yesu patanshi wakilangulukanga kyalengela yewo muntu kwipuzha. Kimye kimo kino kikebewa kukipuzha yewo muntu ene mambo o aipwizha byobyo. Muntu ubena kuzhinauka kine kintu kyo mubujila kusekelela Kiminshiminshi wakonsha kwimwipuzha’mba, “Mwaitabila mwi Yesu nyi?” Inge mwayuka kyalengela yewo muntu kwimwipuzha byobyo, kikemukwasha kwisamba nanji bulongo.—Luka 10:25-37.
3. Ñanyi bintu byo tuji nabyo byakonsha kwitukwasha kutana mikumbu yaumvwanyika ya mu Binembelo?
3 Ingijishainga Mambo a Lesa pa Kukumbula: Umvwe muntu witwipuzha, kyawama bingi kumukumbula mukumbu wa mu Baibolo. (2 Timo. 3:16, 17; Hebe. 4:12) Nangwa kya kuba awo muntu kechi waswa byaamba Baibolo ne, mwafwainwa kumona mo mwakonsha kwisambila nanji pa Binembelo byo bifunjisha. Mutundaikai kulangulukishapo pa maana alumbuluka aji mu Baibolo. Inge saka mukumbula byonka bya kumbulanga Yesu, mikumbu yenu ikekala nobe “bipangwa bya maepo byapasha ngolode byo babika pa masanyi a siliva”—ya mushingi, yawama, kabiji yanema.—Mana. 25:11.
4. Bimye ka byo twafwainwa kubula kukumbula bwipuzho muntu boaipuzha?
4 Nanchi Twafwainwa Kukumbulatu Bwipuzho Bonse Nyi? Umvwe mukumbu wa bobo bwipuzho kechi mwamuyuka ne, kumvwa bumvu ne, ambaitu’mba: “Naluba, akishai nkiye na kupesapesa bino nkabwele na kwimukumbula.” Inge mwakumbula bibye, mukalengela mwina nzubo kwimubula’mba mukabweleko jikwabo. Umvwe mwamona’mba awo muntu ubena kwimutetekatu’mba mwipachikenga, yukai mwakumukumbwila byonka byaubanga Yesu. (Luka 20:1-8) Kabiji inge mwamona’mba muntu ye mubena kwisamba nanji kechi ukeba kuyuka bukine ne, kwipachikanga nanji ne, mushai, mukakebeko bangi bakeba kuyuka bukine.—Mat. 7:6.
5. Ki ka kyalengelanga Yesu kukumbula bulongo mepuzho?
5 Yesu waketekejile mwi Yehoba pa kuba’mba engile mwingilo wanji wa ‘kushimuna bya bukine’ kabiji ne kulumbulwila bantu bamwipuzhanga mepuzho alumbuluka. (Yoa. 18:37) Umvwe ketukumbule bantu ‘batongwelwa bumi bwa myaka’ byonka bya kumbulanga Yesu, ko kuba’mba twatokwa.—Byu. 13:48.