Nanchi Nafikilamo Kusapwila Nyi?
1. Mambo ka o twafwainwa kubula kulanguluka’mba kechi twafikilamo kusapwila ne?
1 Umvwe kimye kimo mwiipuzha buno bwipuzho kechi mwafwainwa kwakamwa ne! Mambo kufunda sukulu nangwa kisemwa kechi byo bitulengela kwikala basapwishi bafikilamo ne. Baana ba bwanga bamo batanshi bebayukile’mba “kechi bafunjile ne.” Nangwa byonkabyo, bayukile bingi kusapwila bulongo mambo awama mambo batelepo muchima kulondela kya kumwenako kya kwa Yesu.—Byubilo 4:13; 1 Petelo 2:21.
2. Yesu wafunjishanga byepi?
2 Yesu byo Afunjishanga: Wafunjishanga mu jishinda japela kabiji bantu bebyumvwanga. Mepuzho, byakumwenako ne byo atendekanga misambo byalengelanga bantu kutako muchima. (Mat. 6:26) Watele bantu muchima. (Mat. 14:14) Kabiji Yesu waambanga na kusumininwa ne na bulume mambo wayukile’mba Yehoba ye wamupele mwingilo ne bulume bwa kumwingila uno mwingilo.—Luka 4:18.
3. Yehoba witukwasha byepi kwingila bulongo mu mwingilo?
3 Yehoba Witukwasha: Kupichila mu Mambo anji ne jibumba, aye Mufunjishi Mukatampe witufunjisha bya kusapwila mambo awama bulongo. (Isa. 54:13) Na mambo a kuba’mba Yehoba walamine byambo byaamba pa byafunjishanga Yesu, lelo jino tutanga ne kulondela byo afunjishanga. Yehoba witupa mupashi wanji ne kwitufunjisha pa kupwila. (Yoa. 14:26) Kabiji witupa basapwishi baibijila betukwasha kwingila bulongo.
4. Mambo ka o twashiinwa’mba twafikilamo kusapwila ku bantu mambo awama?
4 Tuji na bishinka bya kwitulengela kubula kulanguluka’mba kechi twafikilamo kusapwila ne, “mambo kukonsha kwetu kufuma kwi Lesa.” (2 Ko. 3:5) Umvwe twaketekela mwi Yehoba ne kutapo muchima kwingijisha byo etupa tukekala ‘bawaina byonse bya kwingilako mingilo yonse yawama.’—2 Timo. 3:17.