‘Londainga Monka mu Ngayo Yanji’
1. Twakonsha kwikala byepi bamwingilo bafikilamo bulongo?
1 Yesu kechi wayilepo na kufunda mu masukulu akatampe a Bayudea ne, bino wajinga wa Mwingilo mukatampe wayile bingi nkuwa. Kyawama bingi kyo twaikala na byanembwa byaamba pa mambo a mwingilo wa Yesu kuba’mba tuyuke byo ajinga. Pa kuba’mba twikale bamwingilo ba mambo awama bafikilamo bulongo, twafwainwa ‘kulonda monka mu ngayo yanji.’—1 Pe. 2:21.
2. Ki ka kiketukwasha kwikala na butemwe bwajingapo ne Yesu pa bantu?
2 Mweshainga Butemwe ku Bantu: Yesu watele bantu muchima mambo wibatemenwe. (Mako 6:30-34) Bantu bavula mu nyaunda yetu baji mu “misongo” kabiji bakebesha bingi kuyuka bukine. (Loma 8:22) Umvwe ke tulanguluke pa makatazho o babena kupitamo kabiji ne Yehoba byo ebatemwa, kiketulengela kutwajijila na kusapwila. (2 Pe. 3:9) Kabiji bantu bakateleka ku mambo etu umvwe bamona’mba twibatemwa.
3. Bimye ka Yesu byo asapwilangamo bantu?
3 Sapwilainga Patanyiwa Jishuko: Yesu wasapwilanga mambo awama pa bimye byonse byo atananga bantu. (Mat. 4:23; 9:9; Yoa. 4:7-10) Ne atwebatu, tukeba kwikala benengezha kwamba pa mambo a bukine kimye kyo tubena kwingila mingilo yetu yo tuba jonse. Bamo basenda Baibolo ne mabuku kuba’mba bakasapwile ku nkito, ku sukulu, pa lwendo, nangwa umvwe babena kuya ku mashitolo kabiji ne kukwabotu.
4. Twakonsha kulengela byepi Bufumu kwikala kishina kya busapwishi bwetu?
4 Ambainga pa Bufumu: Mambo awama a Bufumu kyo kyajinga kishina kyaambangapo Yesu mu busapwishi bwanji. (Luka 4:43) Nangwa kya kuba mu mwisambo wetu kechi twakonsha kutongolamo Bufumu ne, twafwainwa kumona’mba twakwasha mwina nzubo kuyuka buneme bwa Bufumu. Nangwatu inge tubena kwamba pa byubilo byatama bya panopantanda bibena kumwesha’mba tuji mu moba apelako, javula ‘tusapwila mambo a lusekelo a bintu byawama.’—Loma 10:15.
5. Pa kuba’mba mwingilo wetu engijiwenga bulongo, twafwainwa kwingijisha byepi Baibolo?
5 Ketekelai mu Mambo a Lesa: Mu mwingilo wanji yense, Yesu waingijishanga Binembelo. Kechi wafunjishanga byanji aye mwine ne. (Yoa. 7:16, 18) Wafundanga Mambo a Lesa kabiji ne kwingijisha bintu byo afundangamo pa kukeba kwizhikijila ku meseko a Satana. (Mat. 4:1-4) Pa kuba’mba tufunjishe bantu bulongo, twafwainwa kutanganga Baibolo kimye kyonse kabiji ne kwingijisha byo tufundamo. (Loma 2:21) Pa kukumbula mepuzho mu mwingilo, twafwainwa kutongola Kinembelo kibena kukosesha kishinka kyo tubena kwambapo kabiji ne kwikitanga mu Baibolo, umvwe kyakonsheka. Tukeba mwina nzubo kuyuka’mba kechi tubena kwambatu milanguluko yetu atweba bene ne, bino tubena kwamba milanguluko ya Lesa.
6. Yesu waubile byepi pa kufika banteleki banji pa michima?
6 Fikainga Bantu pa Michima pa Kufunjisha: “Kafwako muntu waambile byo amba uno muntu ne.” (Yoa. 7:46) Bino byo byaambile bakalama pe Yesu kimye bañanga ne Bafaliseo kyo bebepwizhe ene mambo o bakankejilwe kumukwata. Mu kifulo kya kwibabulatu bishinka bantu bo afunjishenga, Yesu wibafunjishe mu jishinda ja kwibafika pa michima. (Luka 24:32) Waingijishe bya kumwenako byo bayukila jimo kuba’mba ebakwashe kumvwisha bintu byo aambilenga. (Mat. 13:34) Yesu kechi wafunjishenga banteleki banji bintu byavujisha pa kimye kimo ne. (Yoa. 16:12) Mfunjishisho yanji yaimenejile pa kupa Yehoba lukumo kechi aye mwine ne. Byonkatu byajinga Yesu, ne atweba twakonsha kwikala bafunjishi bawama kikatakata umvwe ke ‘twikete atwe bene ne lufunjisho lwetu pamo.’—1 Timo. 4:16.
7. Mambo ka Yesu o abujile kuleka kusapwila?
7 Twajijilai Kikale Bantu Baji na Misula Nangwa Bakana: Nangwa kya kuba Yesu waubilenga bya kukumya, kechi bantu bonse bamutelekelenga ne. (Luka 10:13) Nangwatu ba mu kisemi kyanji, bamumwenenga’mba “wakonya.” (Mako 3:21) Nangwa byonkabyo Yesu kechi wikilekele ne. Kechi walefwilwe ne, mambo washiinwe’mba wajinga na bukine bwakonsha kukasulula bantu kwikala ke baana ba bene. (Yoa. 8:32) Na bukwasho bwa Yehoba, ne atweba kechi twafwainwa kuleka ne.—2 Ko. 4:1.
8, 9. Twakonsha kulonda byepi Yesu pa mambo a kwipana kusapwila mambo awama?
8 Ipanai Kwingilako Pakatampe: Yesu watangizheko mwingilo wa busapwishi kechi bintu bya ku mubiji ne. (Mat. 8:20) Wasapwilanga bingi, kimye kimo kufika ne mabanga. (Mako 6:35, 36) Yesu wayukile’mba washajiletu na kimye kicheche kya kwingijilamo mwingilo. Byo kiji kuba’mba “kimye bekikepesha kala,” ne atweba twafwainwa kwingijishanga kimye kyetu, bulume ne mali etu kulonda byonka byaubanga Yesu.—1 Ko. 7:29-31.
9 Bena Kilishitu ba mu myaka kitota kitanshi bajinga ba mwingilo bafikilamo bulongo na mambo a kuba bafunjile kwi Yesu. (Byubilo 4:13) Ne atweba twakonsha kwingila bulongo mwingilo wetu umvwe ke tulondele wa Mwingilo mukatampe wayile nkuwa.—2 Timo. 4:5.