Bukamonyi Bukashimunwa
1. Kununga pa jashi jikambiwa, bintu ka bikwabo byakonsha kuzakula michima ya benyi bakeya ku Kivuluko? Lumbululai.
1 Kimye ka? Pa juba ja Kivuluko. Twakosako bingi na kwita bantu kuba’mba bakeye na kutanwako pamo ne atweba. Bintu benyi byo bomvwa kechi byo byonkatu byakonsha kwibazakula muchima ne. Panyuma ya kutanwa ku Kivuluko, mwanamukazhi umo waambile pa byo amwene, ko kuba’mba lusekelo lwamwesheshe bantu bonse, kuwama kwa mpunzha ne butooto bwa kishimikwa kyo bashimikile ne kwikilama bulongo ku bamwingilo ba kwitemenwa. Onkao mambo, kechi ñambi bunketu ne, atweba bonse tukwatankena pamo kumwesha byubilo byawama ku bonse bo twita pa jino juba janema mu mwaka.—Efi. 4:16.
2. Atweba bonse twakonsha kushimuna byepi bukamonyi ku benyi?
2 Imunai Benyi na Lusekelo: Umvwe twaimuna benyi na lusekelo, tukashimuna bukamonyi bukatampe. (Yoa. 13:35) Nangwa kya kuba kechi mwakonsha kwimuna benyi bonse baiya ne, bino mwakonsha kwiyukanyikisha ku boba bo mwaikala nabo. (Hebe. 13:1, 2) Monainga benyi baiya babula kwiyukapo nangwa na umo ne. Kimye kimo, bebashijile kapepala ka kwichilapo bantu kimye kya mukwekele. Mwakonsha kwibepuzha’mba, “Nanchi kyo kimye kitanshi kyo mwatanwako kuno nyi?” Bambilai kwikala ne anweba, ne kukumbula mepuzho o bakonsha kwikala nao. Umvwe kipwilo kyenu kikapwisha bukiji pa kuba’mba kipwilo kikwabo kikatwelemo, mwakonsha kwibepuzha’mba: “Mbena kukeba kuyuka byo mwalangulukapo pa kuno kupwila. Nanchi mwakonsha kutemwa kwimufwakesha nyi?”
3. Twakonsha kutambwila byepi basapwishi bakoka?
3 Tambwilai Basapwishi bakoka: Kwakubula nangwa kuzhinaukatu ne, basapwishi bakoka ne boba batanwakotu kimye kya Kivuluko, bakeya. Batambwilai ne kwibambila’mba mwatemwa bingi kwibamona. (Loma 15:7) Panyuma ya Kivuluko, bakulumpe mu kipwilo bakonsha kuya na kwibafwakesha ku mazubo abo ne kwibakosesha kutwajijila kwiyanga na kupwila. Tubena kulomba kuba’mba bonse bakatanwako bakatundaikwa kupana lukumo kwi Lesa kechi na mambo a byo bakomvwatu ne, pano bino, ne na byo ‘bakemwena abo bene mingilo yetu yawama.’—1 Pe. 2:12.