Batambwilai!
1. Ñanyi kimye kyo twingilako na ngovu mu mwingilo, kabiji mambo ka?
1 Kimye kya Kivuluko ke kimye kyo twingila na ngovu mu mwingilo. Uno mwaka, twaketekela bantu kukila pa 10 milyoni kwiya na kutanwa ku Kivuluko, ne kufunda pe Lesa ne mwananji byo bamwesheshe amba betutemwa kupichila mu bukuzhi. (Yoa. 3:16; 15:13) Bakafunda bintu byawama bingi byo a kebapa Yehoba. (Isa. 65:21-23) Nangwa byonkabyo, ñambi kechi ye yenkatu bunke ukashimuna bukine pa kikye kimye ne. Basapwishi bonse bakatanwako bakashimuna bukine kupichila mu kutambwila bantu.—Loma 15:7.
2. Twafwainwa kutambwila byepi benyi?
2 Kyafwainwa kuwama kwiimuna na bo twaikala nabo kipi kipi ne kwilumbulula kukila kwikalatu pa kipona na kupembelela jashi. Benyi bomvwa boma ne kuzhinauka bintu byo biji. Kwibemuna ne kwisamba nabo kwibalengela kukasuluka. Pa kuba’mba tuyuke umvwe baiya na mambo a kuba bebechile kupichila mu kapepala twafwainwa kwibepuzha umvwe kyo kimye kitanshi kwiyako nangwa inge kya kuba bayukapo umo mu kipwilo. Kampe mwakonsha ne kwikala nabo pa kuba’mba mutangilenga pamo Baibolo wenu ne kwimbila pamo lwimbo. Umvwe mubena kwingijisha Nzubo ya Bufumu, mwafwainwa kwibapishañanyako pacheche ne kwibalumbulula ku balongo ne banyenga. Panyuma ya jashi kumbulai mepuzho onse o bafwainwa kwimwipuzha. Umvwe kipwilo kyenu kyo kyatatwilapo kabiji mubena kutwela kikwabo, mwakonsha kwamba’mba: “Mbena kukeba kuyuka byo mwalangulukapo pa kuno kupwila. Nanchi mwakonsha kutemwa kwimufwakesha nyi?” Nengezhai kukamonañana kimye kikwabo. Bakulumpe mu kipwilo bafwainwa kutundaika basapwishi bakoka ku mupashi baiya na kutanwako.
3. Mambo ka o kyawamina kutambwila bantu beya ku Kivuluko?
3 Bantu bavula bakatanwako kikekala kimye kitanshi kumona lusekelo, mutende ne kukwatankana kuji pa bantu ba Yehoba. (Sala. 29:11; Isa. 11:6-9; 65:13, 14) Ñanyi bintu benyi betu byo bakavulukanga? Yenka atweba yetu twafwainwa kwibakwasha.