Totai Yehoba pa Mambo a Lusa Lwanji
Kivuluko kya Lufu lwa kwa Yesu Kikekalako pa March 24
1. Yehoba witumwesha byepi lusa lwanji?
1 Nyimbi wa masalamo waambile’mba: “Kine, bantu bamutote Yehoba na mambo a lusa lwanji, Ne na mambo a mingilo yanji ya kukumya yo ebengijila bantu!” (Sala. 107:8) Lusa lwa Lesa lwakila pa kwibalamatu bantu. Kino kishinka kyaambiwapo bulongo mu byambo bya lutotelo byanembeshiwa na mupashi bya kuba’mba: “Lusa lwenu anweba Yehoba, lwankwachile ne kundama.” (Sala. 94:18) Kine Yehoba byo amwesheshepo lusa pa kwitutumina Mwananji yenkawa umotu!—1 Yoa. 4:9, 10.
2. Twakonsha kumwesha byepi lusanchilo kwi Yehoba?
2 Kivuluko kya lufu lwa kwa Yesu byo kyafwenya kala ke pepi, twakonsha kumusanchila byepi ‘Lesa wa lusa’? (Sala. 59:17) Atweba bonse twafwainwa kwikalapo na kimye kya kulangulukalangulukapo pa moba a kwa Yesu apeleleko panopantanda. (Sala. 143:5) Kabiji kyawama bingi kulondela mutanchi wiikajila wa kutanga Baibolo mu moba a Kivuluko, byonka byo atanchikwa mu kabuku ka Kubalaulabalaula mu Binembelo pa Juba pa Juba—2005, kabiji umvwe kyakonsheka, mwakonsha ne kutangilapo byambo bikwabo kabiji ne kupesapesa mu bitango 112-16 mu buku wa Umuntu Wakulisha ne mabuku akwabo alumbulula Baibolo. Langulukalangulukaipo pa byambo byo mubena kutanga, ne kwikala monka mwi abyo. (1 Timo. 4:15) Kutendeka na lulombelo pa kutanga kechi kukoseshatu muchima wetu ne, bino kumwesha ne butemwe bwetu bo twatemwa Yehoba.—Mat. 22:37.
3, 4. (a) Twakonsha kulonda byepi muchima wa balongo betu bena Liberia? (b) Bañanyi bo mubena kulanguluka kwita na kutanwa ku Kivuluko?
3 Kwashai Bakwenu Kutota Lesa: Mwaka wapwa, bantu 16,760,607 bo batainweko ku Kivuluko kuzhokoloka ntanda yonse. Mu muzhi umo mu Liberia, balongo banembejile nkalata bamfumu ya kwi babula pa mambo a kwikala na Kijiilo kya Nkambo kya Mabanga mu muzhi wabo. Bamfumu baitabizhe balongo kwingijisha kibanza kya mpila kubilamo kivuluko kabiji bataile mbila mu muzhi yense, kwita bantu kuba’mba batanweko. Nangwa kya kuba mu uno muzhi mwajingatu balongo batanu, batainweko ku Kivuluko bajinga 636!
4 Byonkabyo, ne atweba tubena kukebesha kwita bantu bavula kwiya na kutanwa ku Kivuluko. Mambo ka a kubujila kunemba mutanchi wa boba bo mubena kukeba kwita? Bya kumwenako biji kunyuma ya nkupiko ya Kyamba kya Usopa kya March 15 bibena kumwesha lwito lwa kwiya na kutanwa ku Kivuluko. Mwafwainwa ne kwingijisha tubipepala twanembwa twa lwito lwa kwita bantu kwiya ku kivuluko. Taipai nangwa nembai bulongo kimye ne mpunzha kukekela Kivuluko pa tubipepala ne kushanga kamo kamo ku muntu yense ye mwaita. Pa kunangijila kwipi na March 24, bwelaiko jikwabo ku bantu bo mwaichile na kwibavululako kabiji ne kwibabula biji lunengezho.
5. Twakonsha kukwasha byepi botufunjisha Baibolo kutanwako?
5 Twakonsha kukwasha byepi botufunjisha Baibolo bakyangye kutatula kutanwa ku kupwila kumwenamo pakatampe mu Kivuluko? Ikalaiko na kimye kyafwainwa pa lufunjisho lumo lumo kuba’mba mwibakwashe kumvwisha buneme bwa kivuluko. Mwakonsha kutana byambo byawama mu buku wa Ukupelulula mapeja 214-8.
6. Mambo ka o kyanemena kutambwila benyi pa Kivuluko?
6 Tambwilai Benyi: Pa Kivuluko, solomokai benyi kabiji ne kwibatambwila. (Loma 12:13) Nengezhai kwikala pamo nabo mwaichile, kabiji ne kumona kuba’mba baji na Baibolo ne buku wa lwimbo. Kabiji twafwainwa kutambwila na lusekelo balongo ne banyenga bonse bakoka ku mupashi bebikako kwiya na kutanwako. Umvwe twibatambwila na butemwe bakonsha kutendeka jikwabo kupwanañena pamo na kipwilo. (Luka 15:3-7) Pa kuno kupwila kwazhila, twayai twingile papelela bulume bwetu kukwasha bakwetu kutota Yehoba pamo ne atweba pa mambo a “lusa lwanji lwa kukumya.”—Sala. 31:21.