“Mutemwai Yehoba, Anweba Bazhijikwa Banji Bonse”
Lufu lwa Yesu Lukavulukwa pa April 4
1 Myaka ya kunyuma kwe, kimye kyalo kya Ukraine byo kyajinga mu maboko a kafulumende wa Komyunisiti, balongo bebabezhezhenga ku bantangi konse konse, kikatakata juba ja Kijiilo kya Nkambo byo jafikile, kuketekela amba bayuke mpunzha po bapwila. Kino kyashupile bingi, mambo bantangi bayukile moba ekelamo Kivuluko. Nanchi balongo bakonsheshe kubapo byepi? Nyenga umo wajinga na nzubo yajinga na kibamba kya panshi mwayujile mema. Na mambo akuba bantangi kechi baketekejile amba bantu bakonsha kupwila mu ino nzubo ne, balongo bashimikile pulatifomu peulu ya mema afikilenga mu manungo. Nangwa kyakuba baikele kya kufukama pa pulatifomu na mambo a bwipi bwa palafu, bantangi kechi baishileko na kukatazha balongo kimye kyo bavulukilenga Kivuluko na lusekelo ne.
2 Kwibikishako kwa balongo ba mu Ukraine kwa kumvwina mukambizho wa kuvuluka lufu lwa Yesu, kwamwesheshe kuba’mba kine bamutemwa Lesa. (Luka 22:19; 1 Yoano 5:3) Kimye kiji kyonse kyo twatalañana na mikiika mu bwikalo bwetu, bya kumwenako bya uno mutundu byakonsha kwitutundaika ne kwibikila kikonkwanyi kya kutanwako ku Kijiilo kya Nkambo kya Mabanga pa April 4. Mu jino jishinda, tumwesha’mba twiumvwa byonka biumvwine nyimbi wa masalamo waambile’mba: “Mutemwai Yehoba, anweba bazhijikwa banji bonse.”—Sala. 31:23.
3 Kukwasha Bantu Kutemwa Lesa: Butemwe bo twatemwa Lesa bwitutundaika kwitako bakwetu kwiya na kutanwako ku Kivuluko kya lufu lwa Yesu. Kya mukachi kiji mu Mwingilo Wetu wa Bufumu wa February kitutundaikile pa muntu pa muntu kunemba mutanchi wa boba bonse botukeba kwitako kwiya na kutanwa ku Kivuluko. Abya mubena kulondela mutanchi wenu bulongo po mwanemba bantu ne kwibabula kuba’mba bakatanweko nyi? Monaipo kimye kya kwibalumbulwila mwatala kivuluko. Kwibavululako juba ne kimye kya Kivuluko mu butemwe ne kwendela nabo pamo umvwe kyakonsheka, kyakonsha kwibatundaika kutanwako.
4 Pa mpunzha pa kupwijila Kivuluko, monai’mba mwaimuna bonse baiya kutanwako botwaichile, ne kwibalengela kwikala bakasuluka. Mwakonsha kwibakwasha byepi kukomesha butemwe bwabo bwa kutemwa Yehoba? Inengezhai kukumbula mepuzho abo. Labijilai kutatula lufunjisho lwa Baibolo umvwe kyakonsheka. Bambilai kwiya na kutanwangako ku kupwila kwetu kwa mulungu ne mulungu. Kikatakata bakulumpe mu kipwilo bafwainwa kulabijila bena Kilishitu bakoka baiya na kutanwako. Bakonsha kunengezha lunengezho lwa kwibafwakesha ba yenka uno mutundu ne kwibatundaika kwikala na kizaku jibiji kya kwingijila pamo na kipwilo kampe kupichila mukwisambapo pa byambo byaambiwepo mu jashi ja Kivuluko.—Loma 5:6-8.
5 Kubaisha Butemwe Bwetu bwa Kutemwa Yehoba: Kulangulukishapo pa bupe bwa bukuzhi, kwakonsha kubaisha butemwe bwetu bwa kutemwa Yehoba ne Mwananji. (2 Ko. 5:14, 15) Kamonyi umo watanwa ku Kivuluko pa myaka yavula waambile amba: “Tubena kutengela Kivuluko. Jonse pa mwaka pa mwaka, kituwamina bingi. Mvuluka saka naimana mu nzubo ya majila myaka 20 yapitapo, kasa ntala kitumbi kya batata, kabiji kino kyandengejile kunemeka ne kusanchila bukuzhi kukilatu ne kala. Batata saka bakyangye kufwa, kino nekiyukishetu bulongo. Mama! nayukile binembelo byonse byaamba pa bukuzhi ne bya kwibilumbulula. Bino kufikatu kimye kyo naumvwishishe lufu mo lwatala, popo naponejile mu lusekelo lwa kine kine lwa kuyuka buneme bwa bukuzhi byo buketubila.”—Yoano 5:28, 29.
6 Juba ja Kivuluko kya uno mwaka byo jibena kufwenya pepi, monaipo kimye kya kunengezhezha jimo muchima wenu pa kino. (2 Moba. 19:3) Languluka langulukaipo pa binembelo biji mu mutanchi wa kutanga Baibolo mu Moba a Kunangijila ku Kivuluko byanembwa mu Kubalaulabalaula mu Binembelo pa Juba pa Juba—2004 ne pa Kalenda wa 2004. Bamo batemwa bingi kupituluka mu byapitala 112-16 biji mu buku wa Umuntu Wakulisha pa kufunda lufunjisho lwabo lwa kisemi. Bakwabo bapeselapeselapo bishinka bikwabo kwingijisha mabuku akwabo o twingijisha kufunjilamo anengezhewa na jibumba ja kalume wa kishinka ne wa maana. (Mat. 24:45-47) Atweba bonse twafwainwa kuvwangangamo mu milombelo yetu ya na mukoyo lusanchilo lwa bupe bwa bukuzhi. (Sala. 50:14, 23) Ee kine, mu kino kimye kya kunangijila ku Kivuluko, twayai tutwajijile kumwesha butemwe boetumweshapo Yehoba ne kumonapo mashinda amo a kumwesheshamo butemwe bwetu botwamutemwa.—Mako 12:30; 1 Yoano 4:10.