Kakitenguluzha Ka Mepuzho

◼ Kufunjisha muntu ubena kuba bulongo ku mupashi kwakonsha kutaya kimye kyabaya byepi?

Kyawama kutwajijila kufunjisha ye mufunjisha Baibolo ubena kuba bulongo ku mupashi kanatu wapwisha mabuku onse abiji a kuba’mba: Nanchi Baibolo Kine Ufunjisha’mba Ka? ne ‘Ikalai Monka mu Butemwe bwa Lesa.’ Kino kya kine nangwa kya kuba ye mufunjisha Baibolo wabatizhiwa saka akyangye kupwisha mabuku onse abiji. Panyuma ya kubatizhiwa, twakonsha kutwajijila kunemba maola, bimye byo twabweleleko, ne lufunjisho. Umvwe uno musapwishi twaya nanji mu mwingilo kabiji keambepo kimye kyo tubena kufunjisha, naye wakonsha kunemba maola.—Monai Mwingilo Wetu wa Bufumu wa March 2009, jipa 2.

Kyanema bingi bakatataka kwikala na kitendekesho kya bukine kyakosa saka tukyangye kuleka kwibafunjisha. Bafwainwa “kutabilamo” mwi Kilishitu ne “kukoselamo mu lwitabilo” pa kuba’mba bakakonshe kushinda makatazho o bakekalanga nao. (Kolo. 2:6, 7; 2 Timo. 3:12; 1 Pe. 5:8, 9) Kunungapo, pa kuba’mba bafunjishe bantu bulongo, bafwainwa ‘kuyukisha bulongo bukine.’ (1 Timo. 2:4) Umvwe twapwisha kwibafunjisha mu ano mabuku onse abiji, ko kuba’mba twibakwasha kwikala bakosa ne kutwajijila kwenda mu jishinda “jitwala ku bumi.”—Mat. 7:14.

Saka bakyangye kuswisha muntu kubatizhiwa, bakulumpe mu kipwilo bafwainwa kumona kuba’mba uno muntu waumvwisha bulongo mafunjisho atanshi a mu Baibolo kabiji ubena kwialondela. Bakulumpe bafwainwa kujimuka kikatakata kimye kyo babena kupitulushamo muntu wabula kupwisha buku mutanshi wa kufundamo. Umvwe muntu kechi wafikilamo kubatizhiwa ne, bakulumpe bafwainwa kumukwasha mubena kukebewa pa kuba’mba akafikilemo kubatizhiwa kulutwe.—Monai buku wa Bakwatankana Kuba Kyaswa Muchima wa Yehoba, mapa 217-218.

[Mabulañano pa peja 2]

Kyanema bingi bakatataka kwikala na kitendekesho kya bukine kyakosa