Mashinda

A Kutendekelamo Mafunjisho a Baibolo pa Kibelushi Kitanshi mu September

“Atweba bonse twafwishapo kala ba mu kisemi nangwa bakwetu. Nanchi muji na luketekelo lwa kwibamonapo jikwabo nyi? [Lekai akumbule.] Akimonai bino byambo bya lutekenesho.” Tangai ne kwisamba byambo biji pa kamutwe katanshi kaji pa jipa 26 mu Kyamba kya Usopa kya July—September ne kutanga Binembelo byo bamwesha’mba tangai. Bashilai uno magazini ne kwibabula’mba mukabwelako na kukumbula bwipuzho bwalondelapo.

Kyamba kya Usopa July–September

“Bantu bavula baji na luketekelo lwa kuya mwiulu inge bafwa. Nanchi ne anweba byo mulanguluka nyi? [Lekai akumbule.] Akimonai Yesu byo aambile pa mambo a kuya mwiulu. [Tangai Yoano 3:13.] Uno magazini walumbulula byaamba Baibolo pa mambo a boba bakaya mwiulu kabiji ne byo bakobanga.” Mu mweshai kibaba kiji pa jipa 22.

Awake! September

Lelo jino bantu bavula baji bingi na bijikila na mambo a makatazho a mali. Mambo ka o mwalangulukila’mba kyakatazha kumona mwa kwikela? [Lekai akumbule.] Mu Baibolo muji maana akwasha bantu bavula kuyuka bya kwingijisha mali bulongo. [Tangaipo kinembelo kimo pa binembelo biji pa mapa 8-9.] Mu uno magazini muji bishinka byakonsha kukwasha boba baji na nkongole.”