Nemekainga Mwingilo Wenu wa Kusapwila
1. Bantu bavula mu ino ntanda bamona byepi mwingilo wetu wa kusapwila?
1 Bantu bavula mu ino ntanda ya kwa Satana bamona mwingilo wetu wa kusapwila amba “bumbulwamaana.” (1 Ko. 1:18-21) Umvwe twabula kujimuka, ndangulukilo ya uno mutundu yakonsha kwitulefula ne kwitupwishisha kizaku kyetu. (Mana 24:10; Isa. 5:20) Bishinka ka bitulengela kunemeka jishuko jetu ja kwikala Bakamonyi ba kwa Yehoba?—Isa. 43:10.
2. Mambo ka mwingilo wa kusapwila o twakonsha kumutela’mba “mwingilo wazhila”?
2 “Mwingilo Wazhila”: Mutumwa Paulo waambilepo pa mwingilo wa kusapwila amba ke “mwingilo wazhila.” (Loma 15:15, 16) Uno Mwingilo wa kusapwila waikala byepi “mwingilo wazhila”? Kwingilako uno mwingilo kwitulengela kwikala “bamwingilo” umo na “Wazhila,” aye Yehoba kabiji kino kilengela ne jizhina janji kuzhijikwa. (1 Ko. 3:9; 1 Pe. 1:15) Yehoba umona mwingilo wetu wa kusapwila kwikala “kitapisho kya kutota,” onkao mambo, mwingilo wetu wa kusapwila ke kintu kimo kyanema bingi mu mpopwelo yetu.—Hebe. 13:15.
3. Ki ka kilengela mwingilo wa kusapwila mambo awama kuleta munema?
3 Kusapwila mambo awama ke mwingilo wanema bingi wingilatu bantu bacheche. Kwa kubula nangwa kuzhinaukatu ne, bamalaika bakonsha kutemwa ne kuteshako bingi muchima kwingila uno mwingilo. (1 Pe. 1:12) Pano bino, Yehoba wasala atweba bantu bambulwa kulumbuluka “bipe bya buchimba” kwingila uno mwingilo wanema!—2 Ko. 4:7.
4. Twakonsha kumwesha byepi amba twanemeka mwingilo?
4 Kintu Kitanshi Kyakila mu Kunema: Na mambo a kuba’mba twanemeka uno mwingilo wetu, tumumona kwikala ‘kintu kyanemesha’ mu bwikalo bwetu. (Fili. 1:10) Onkao mambo, twikalapo na kimye mulungu ne mulungu kya kwingilako uno mwingilo. Nyimbi wanemeka mwingilo wanji wa kwimba pa kuba’mba embenga bulongo ku bantu, kimye kyonse wafwainwa kunengezhezha jimo bulongo saka a kyangye kutendeka kwimba kabiji ne kwibikako kwikala sendwe. Kyo kimotu ne atweba, twafwainwa kunengezhezha jimo saka tukyangye kuya mu mwingilo pa kuba’mba ‘tulumbulule bulongo mambo a bukine,’ ne kwibikishako kuwamishako “busendwe bwa kufunjisha.”—2 Timo. 2:15; 4:2.
5. Bañanyi basanta pa mwingilo wetu ye twingila?
5 Kange mulefulwe na mambo a kuba’mba bantu kechi bamwesha lusekelo ku uno mwingilo ne. Yukai’mba bantu bavula baji mu nyaunda yetu basanta bingi byo twibafwakesha ku mazubo abo. Nangwa byonkabyo, kechi twingila’mba tutokeshe bantu pa muchima ne. Kyakila mu kunema ke Yehoba byo eumvwa kabiji wanemeka bingi kwibikishako kwetu kwa kwingila mwingilo.—Isa. 52:7.