Twapewa kya Buneme
1 Mutumwa Paulo wanemekele bingi mwingilo wanji wa kusapwila ye bamupele kwi Lesa kabiji wamutongwele’mba “kya buneme.” (2 Ko. 4:7) Wachinchikile makatazho ne lupato pa kwingila uno mwingilo. Wibikilengako bingi kusapwila muntu uji yense ye atainenga. Waendele ñendo yavula yakatezhe bingi panshi ne pa mema ya kubika bumi bwanji mu kizumba. Twakonsha kulonda byepi Paulo ne kumwesha’mba twanemeka mwingilo wetu? (Loma 11:13) Ki ka kilengela mwingilo wetu kwikala wakilamo kunema?
2 Kya Buneme Bwakila: Bya buneme bya panopantanda javula biletatu makatazho kabiji kechi mufumapotu ne mfweto ya ntaka ne. Bino mwingilo wetu uleta mfweto ya myaka kwi atwe bene ne ku bantu bakwetu. (1 Timo. 4:16) Ukwasha bantu bakishinka kuyuka Yehoba, kupimpula byubilo byabo, ne kwikala na luketekelo lwa kine lwa bumi bwa myaka. (Loma 10:13-15) Kupichila mu kunemeka mwingilo wetu, tuyuka nkebelo ya bwikalo bwetu, kwiumvwa bamwingilo ne kukosesha luketekelo lwetu lwa kimye kya kulutwe.—1 Ko. 15:58.
3 Mweshainga’mba Mwanemeka kya Buneme Kyenu: Buneme bo tunemeka kintu javula bumwekela mu byo tukeba kutayilapo pa kyokyo kintu. Byo jijipo jishuko ja kwingijisha kimye ne bulume bwetu kutotelamo Yehoba! (Efi. 5:16, 17) Jishinda jo twingijishishamo kimye kyetu jafwainwa kumwesha’mba twanemekako bintu bya ku mupashi kukila bya ku mubiji. Byo tuji na kintu kya buneme kyo twafwainwa kubulako bantu, tukeba kusapwila na kizaku kabiji ne kuteshako muchima kubulako bantu ano mambo awama pa kimye kiji kyonse.
4 Bintu bya buneme javula kechi bebifya ne, bebishatu patoka kuba’mba bantu bebimonenga. Inge ke tumumone mwingilo wetu kwikala kya buneme, kikekala kintu kikatampe mu bwikalo bwetu. (Mat. 5:14-16) Na michima ya lusanchilo, twayai tulondelenga mutumwa Paulo ne kushukilwa kimye kiji kyonse kumwesha’mba twanemeka bingi mwingilo wetu, kabiji tumumona’mba kya buneme.