Fwenyai Kwipi Ne Lesa

Mwakonsha Kutana ‘Maana a Kumuyuka Lesa’

YEHOBA LESA wanengezha kuba’mba tutane kya buneme, kabiji kyo kyaswa muchima wanji kuba’mba twikitane. Kino kya buneme kechi kilengela kunonka ku mubiji ne, bino mukafuma kintu kyanema mali onse a mu ntanda kyo akonsha kukankalwa kupota. Ko kuba’mba, mukafuma mutende wa kine, kutondwa ne kwikala bwikalo bwawama. Kino kya buneme kyo ki ka? Byambo bya Mfumu wa maana aye Solomone byanembwa pa Byambo bya Mana 2:1-6 byalumbulula kino kya buneme.

Solomone watongola kino kya buneme amba ke ‘maana a kumuyuka Lesa,’ ko kuba’mba bukine pe Lesa ne nkebelo yanji yamweshiwa mu Baibolo. (Kyepelo 5) Kino kya buneme kiji na mbaji yavula.

Mafunjisho a kine. Baibolo wakumbula mepuzho nabiji a kuba’mba: Lesa jizhina janji ñanyi? (Salamo 83:18) Ñanyi kintu kyubiwa inge muntu wafwa? (Salamo 146:3, 4) Mambo ka o twaikelako? (Ntendekelo 1:26-28; Salamo 115:16) Mikumbu ya ano mepuzho yanema bingi.

Lujimuno lwa maana. Baibolo witubula jishinda jawama kwikelamo. Mwakonsha kuba byepi pa kuba’mba masongola abule kupwa? (Efisesa 5:28, 29, 33) Mwakonsha kukomesha byepi baana mu jishinda jawama? (Mpitulukilo ya mu mizhilo 6:5-7; Efisesa 6:4) Mwakonsha kwikala byepi ba lusekelo mu bwikalo? (Mateo 5:3; Luka 11:28) Nanchi mwayuka amba mikumbu yaketekelwa ya ano mepuzho yanema nyi?

Kuyuka biji Lesa ne byubilo byanji. Baibolo yo nsulo ine yakonsha kwitukwasha kuyuka bukine pe Lesa. Nanchi Lesa uji byepi? (Yoano 1:18; 4:24) Nanchi wituta muchima nyi? (1 Petelo 5:6, 7) Ñanyi byubilo byanji bimo bikatampe? (Kulupuka 34:6, 7; 1 Yoano 4:8) Nanchi kyawama kuyuka bukine bwaamba pe Mulenga wetu nyi?

‘Maana a kumuyuka Lesa’ o akonsha kwitukwasha kya kine kufwenya kwipi ne Lesa. Mwakonsha kwiatana byepi? Jishinda ja kwiatainamo janembwa mu Byambo bya Mana kitango 2 kyepelo 4, Solomone po aesakanya maana a kuyuka ku “bya buneme byafyamika.” Akilangulukai pa kino: Kintu kya buneme kyafyamika kechi kiletatu kine kufuma po kyajinga pafyamika ne. Twafwainwa kwibikako pa kuba’mba twikitane. Byo byo kiji ne na maana a kuyuka Lesa. Kino kya buneme kyafyama mu Baibolo. Pa kuba’mba twikitane, twafwainwa kwingila na ngovu.

Solomone walondolola byo twafwainwa kuba pa kuba’mba tutane ‘maana a kumuyuka Lesa.’ Byambo bya kuba’mba, “kutambula byambo byami” ne “kutesha muchima wobe” bimwesha amba twafwainwa kwikala na muchima wa kutambwila byambo. (Byepelo 1, 2) Kabiji byambo bya kuba’mba ‘kujijila,’ ‘kukeba’ ne ‘kukebesha’ bimwesha amba twafwainwa kwibikishangako atweba bene kwitendekelako. (Byepelo 3, 4) Onkao mambo, pa kuba’mba tutane kya buneme, twafwainwa kwibikishangako kufunda Baibolo na muchima wa kishinka.—Luka 8:15.

Umvwe ke twitendekeleko kuba bino, Yehoba uketukwasha kutana kya buneme. Kyepelo 6 kyaamba’mba: ‘Yehoba ye upana maana.’ Kanatu na bukwasho bwa Lesa po po twakonsha kumvwisha bukine buji mu Baibolo. (Yoano 6:44; Byubilo 16:14) Mwakonsha kuketekela amba: Umvwe kemupesepese mu bukishinka mu Mambo a Lesa, mukatana ‘maana a kumuyuka Lesa,’ kino kyo kya buneme kyakonsha kwimulengela kwikala bulongo.—Byambo bya Mana 2:10-21.a

[Tubyambo twa mushi]