Kusapwila Bufumu—Ke Jishuko Jikatampe Bingi
1 Pa juba pa juba, bantu bavula panopantanda bamwenamo bingi mu bintu bipana Yehoba bitukwasha kwikala bomi. (Mat. 5:45) Nangwa byonkabyo, bachechetu bo baji na jishuko ja kusanchila Mulenga wabo kupichila mu kusapwila mambo awama a Bufumu. (Mat. 24:14) Nanchi jino jishuko jikatampe mwijinemeka byepi?
2 Kusapwila Bufumu kunemeka Lesa, kabiji kuletela luketekelo ne mutende ku bantu baakamwa na mambo a bino bimye bya malwa. (Hebe. 13:15) Ku boba baswa ano mambo, ebapa luketekelo lwa bumi bwa myaka. (Yoa. 17:3) Ñanyi mwingilo wa ku kyalo wakosha kuleta ino mfweto? Mutumwa Paulo wamwesheshe lusanchilo lwanji mu mwingilo kupichila mu byo amwingijilenga. Wamunemekele bingi.—Byubilo 20:20, 21, 24; 2 Ko. 4:1, 7.
3 Kunemeka Jishuko Jetu Jikatampe: Jishinda jimo jo tumwesheshamo lusanchilo ku jishuko jetu ja kusapwila ke kumona ñiñijilo yetu byo iji. Abya twikalapo na kimye kya kunengezha byambo byakonsha kuzakula banteleki betu nyi? Abya twafwainwa kunungululako busendwe bwetu mu ñiñijishilo ya Binembelo ne kwambañana na bantu nyi? Abya nyaunda yetu twiipwisha kwiingila yonse bulongo nyi? Nanchi twayuka bya kutendeka ne kufunjisha lufunjisho lwa Baibolo nyi? Byonka byajinga bena Kilishitu bakishinka bakala ne balelo, tutundaikwa na mweno yawama ya uno mwingilo kabiji twijinemeka bingi jino jishuko jetu.—Mat. 25:14-23.
4 Umvwe tubena kuyandakana na bukote, kubela bela, nangwa na makatazhotu akwabo, kitekenesha bingi pa kuyuka’mba mukoyo wetu wa kwibikako kuya mu mwingilo unemekwa bingi. Mambo a Lesa etubujishatu mu bukishinka’mba Yehoba unemeka bingi mingilo ya uno mutundu ya ku mwingijila, nangwa yoya ibula kumweka kunema ku meso a bantu.—Luka 21: 1-4.
5 Kusapwila Bufumu kuleta lusekelo. Nyenga umo wa myaka ya kusemwa 92 waambile’mba: ‘Ke jishuko jikatampe bingi inge nalanguluka pa myaka 80 yo naingijila Lesa kwakubula kwilangulushapo ne! Inge kya kuba kwajinga kubwela ku bwanyike jibiji, nafwainwa kwikala byonkabye, mambo ‘lusa lwa Lesa lwakila bumi.’” (Sala. 63:3) Twayai netuwa tunemeke jino jishuko jikatampe jafuma kwi Lesa—ja mwingilo wa kusapwila Bufumu.