Nanchi Mwinengezhezha Jimo ku Misongo Ipulumukatu Nyi?

Misongo yakonsha kupulumukatu. (Yako. 4:14) Onkao mambo, awa wajimuka ukenengezhezha jimo bulongo. (Mana 22:3) Nanchi mwasalapo michi ne mashinda a kwimubukilamo o mukaswa, kabiji abya mwanemba byo mwafuukulapo nyi? Pa kwimukwashako, kuji vidyo wa kuba’mba Transfusion-Alternative Health Care—Meeting Patient Needs and Rights, kabiji kwalupulwa ne vidyo wa bubiji pa DVD wa Transfusion-Alternatives—Documentary Series. Byo musakutambanga uno vidyo, monai inge mwakonsha kukumbula ano mepuzho. Na mambo a kuba mu uno vidyo muji bipikichala byo bamwesha bantu bo babena kutumbula, bansemi bafwainwa kuyuka mwa kubila pa kutamba uno vidyo na baana babacheche.

(1) Mambo ka bashayuka ba mu bipatela bamo o babena kupesela peselapo jikwabo pa mambo a kwingijisha mashi? (2) Tongolaipo mashinda asatu akatazha a kutumbwilamo bantu aubiwapo kala kwa kubula kwingijisha mashi. (3) Mambo ka bashayuka bavula ba mu bipatela ne boba batumbulañana kuzhokoloka ntanda yonse o baswila kubuka balwazhi kwa kubula kwingijisha mashi? (4) Bintu ka bya katataka byo batana mu bipatela pa mambo a kwingijisha mashi? (5) Ñanyi bizumba biji mu kubikwa mashi? (6) Bintu ka bashayuka ba mu bipatela bavula byo bayuka pa mambo a mfweto iji mu kwingijisha michi yabulamo mashi? (7) Ki ka kilengela mashi kukepa mu mubiji, kabiji ki ka kyakonsha kubiwa pa kuba’mba abwelemo? (8) Nga maselo achila (red-cells) akonsha kulengwa byepi bukiji bukiji mu mubiji wa mulwazhi? (9) Mashinda ka o babena kwingijisha a kukepeshako kufuma kwa mashi kimye kya kutumbula muntu? (10) Abya mashinda a kubukilwamo kwa kubula kwingijisha mashi akonsha kwingila ku baana babacheche nangwa ku bakulumpe baji mu misongo ikatampe nyi? (11) Ñanyi jishinda jimo jawama kulondela ja kubukilwamo bulongo?

Byo kiji kuba’mba kuswa mashinda amo a kubukilwamo o bamwesha mu uno vidyo ke kintu kyafwainwa kufuukulapo muntu kwesakana na jiwi janji ja mu muchima, kechi mwafwainwa kupembela mwakikolwa bino po ke musale jishinda ja kubukilwamo jo mukeba nangwa jo mubula kukeba ne. Kitango 7 kya mu buku wa “Butemwe bwa Lesa” ne bibaba bikwabo ne kyamukachi kiji mu Mwingilo Wetu wa Bufumu wa November 2006 byakonsha kwimukwasha kufuukulapo bulongo. Umvwe mwabatizhiwa, nembai byo mwafuukulapo pa kikachi kya DPA ne kwendanga nakyo kimye kyonse.

[Mabulañano pa peja 3]

Nanchi mwasalapo michi ne mashinda a kwimubukilamo o mukaswa ne kwianemba nyi?